ފިލްމީ ދާއިރާ އިން "ބްރޭކެއް" ނެގުމަށް ފަހު ރައްޔިތުންގެ މަޖިލިހަށް ކުރިމަތިލުމަށް މަޝްހޫރު ފިލްމީ ތަރި އަލީ ސީޒަން ނިންމައި އެކަން އިއުލާންކޮށްފި އެވެ.

ދިވެހިންގެ ގިނަ ބައެއްގެ މެދުގައި މަގުބޫލް ސީޒަން ފިލްމީ ދާއިރާ އިން ބްރޭކެއް ނެގި ކަން އިއުލާން ކުރީ މި މަހުގެ ކުރީކޮޅެވެ. އަދި މަޖިލިސް އިންތިހާބުގައި ވާދަކުރަން ނިންމި ކަން އިއުލާން ކުރީ މިއަދެވެ.

ސީޒަން ކުރިމަތިލަނީ މަޖިލިހުގެ ތުލުސްދޫ ދާއިރާގެ މެމްބަރު ކަމަށެވެ. ސީޒަން ހުރީ ޕީޕީއެމް/ޕީއެންސީގެ ޓިކެޓުގައި އެ ދާއިރާ އަށް ވާދަކުރުމަށެވެ. އަދި އެ ދާއިރާގެ ޕްރައިމަރީއެއް ބާއްވަން ޖެހިއްޖެ ނަމަ، އޭނާ ހުރީ ކުރިމަތިލާން ތައްޔާރަށެވެ. އެ ދާއިރާ މިހާރު ތަމްސީލް ކުރައްވަނީ އަމިއްލަ ގޮތުން އެ ގޮނޑި އަށް އިންތިހާބު ވެވަޑައިގެންނެވި އިބްރާހިމް ނަސީމެވެ.

ތުލުސްދޫ ދާއިރާގައި ހިމެނެނީ ކ. ތުލުސްދޫގެ އިތުރުން ކ. ހިންމަފުއްޓާއި ކ. ދިއްފުއްޓެވެ.

ސީޒަން ބުނީ ތުލުސްދޫ ދާއިރާ އަށް ވާދަކުރަން ނިންމީ އެ ރަށަކީ އޭނާއަށް ހާއްސަ ރަށަކަށް ވާތީ ކަމަށެވެ. އެގޮތުން ވަރަށް ކުރިއްސުރެވެސް އެ ރަށުގެ އެކި ކަންކަމުގައި މަސައްކަތް ކުރެވިފައިވާ އިރު، އެ ދާއިރާ ކާމިޔާބު ކުރެވޭނެ ކަމުގެ ޔަގީންކަން އެބައޮތް ކަމަށް ސީޒަން ބުންޏެވެ.

ދާއިރާގެ ރައްޔިތުންނާ ގާތް ގުޅުމެއް އޮތް ކަމަށާއި ގޮނޑި ކާމިޔާބު ކުރައްވައި އެ ދާއިރާގެ ރައްޔިތުންނަށް ހިދުމަތް ކުރާނެ ކަމަށް ވެސް ސީޒަން ބުނެފައިވެ އެވެ.

ސީޒަން ވަނީ ރިޔާސީ އިންތިހާބުގެ ކެމްޕެއިންގައި ޑރ. މުހައްމަދު މުއިއްޒަށް އިންތިހާބު ކާމިޔާބުކޮށް ދިނުމަށް މަސައްކަތްކޮށްފައެވެ. އެގޮތުން ކެމްޕެއިނަށް އެކި ރަށްރަށް ސީޒަން ދިޔަ އެވެ.