އަންނަ އަހަރުގެ ރައްޔިތުންގެ މަޖިލީހުގެ އިންތިހާބުގައި ކުޅުދުއްފުށީ އުތުރު ދާއިރާއަށް ވާދަ ކުރައްވާނެ ކަމަށް މާލެ ސިޓީގެ ޑެޕިއުޓީ މޭޔަރު އަހުމަދު ނަރީޝް އިއުލާން ކުރެއްވުމަށް ފަހު، އެ ނިންމުން އަނބުރާ ގެންދަވައިފި އެވެ.

ކުޅުދުއްފުށީ އުތުރު ދާއިރާގެ ޕީޕީއެމް/ޕީއެންސީ ޕްރައިމަރީގައި ވާދަކުރައްވަން އޭނާ ނިންމަވާފައިވާ ކަން ނަރީޝް ހާމަކުރެއްވީ މިދިޔަ މަހު އެވެ. އޭރު އޭނާ ވިދާޅުވި ގޮތުގައި އެގޮތަށް ނިންމީ އެ ދާއިރާގެ ރައްޔިތުންގެ އެދުމުގެ މަތިންނެވެ.

ނަމަވެސް ނަރީޝް ރޭގައި ކުރެއްވި ޕޯސްޓެއްގައި ވިދާޅުވީ ކުޅުދުއްފުށީގެ ރޫހު ހުރީ އެރަށު މީހަކަށް މިފަހަރު ވެސް ޖާގަ ދޭގޮތަށް ކަން އެނގިގެން ގޮސްފައިވާ ކަމަށެވެ.

"ކުޅުދުއްފުށީ ރޫހު އޮތީ ވަރަށް ބޮޑަށް ވަތަނީކޮށް. ރަށު ދަރި ރަށަށް އިންތިހާބުކުރުމުގެ ރޫހުގައިކަން ވަރަށް ބޮޑަށް ފާހަގަވި" ނަރީޝް ވިދާޅުވިއެވެ.

ނަވާރަ ވަނަ މަޖިލިހުގައި ކުޅުދުއްފުށި ދެ ދާއިރާގައިވެސް ތިއްބަވަނީ އެ ރަށަށް އުފަން މެމްބަރުންނެވެ.

ނަރީޝް މާލެ ސިޓީ ކައުންސިލްގެ މެމްބަރު ކަމަށް އިންތިހާބުވެވަޑައިގަތީ 2021 ވަނަ އަހަރުގައެވެ. ރައީސް އިބްރާހިމް މުހައްމަދު ސޯލިހްގެ ސަރުކާރު ވެރިކަމާ ދެކޮޅަށް މާލޭގައި ކުރިއަށް ގެންދިޔަ މުޒާހަރާތަކުގައި އިސް ސަފުގައި އޭނާ ހުންނެވި އިރު، ބައެއް މުޒާހަރާތަކާ ގުޅިގެން އޭނާ ހައްޔަރު ވެސް ކުރިއެވެ.

މީގެއިތުރުން ނަރީޝް ވަނީ ޗެނަލް 13 ގެ ބައެއް ޕްރޮގްރާމްތައް ވެސް ހުށަހަޅުއްވައި ދެއްވައިފައެވެ.