މާބަނޑު ދުވަސްވަރާ ބެހޭ ގޮތުން ބޮލީވުޑްގެ މަޝްހޫރު ބަތަލާ ކަރީނާ ކަޕޫރު ލިޔުނު ފޮތުގެ މައްސަލާގައި އިންޑިއާގެ މަދްޔަ ޕްރަދޭޝްގެ ހައިކޯޓަށް ހާޒިރުވުމަށް ނޯޓިސް ފޮނުވައިފި އެވެ.

މީގެ ތިން އަހަރެއްހާ ދުވަސް ކުރިން ކަރީނާ ލިޔުނު ފޮތުގެ ނަމަކީ "ކަރީނާ ކަޕޫރް ހާންސް ޕްރެގްނަންސީ ބައިބްލް" އެވެ.

ކަރީނާ ލިޔުނު ފޮތުގެ ނަމުގައި "ބައިބަލް" ހިމަނާފައިވާތީ އޭނާގެ މައްޗަށް ޖިނާއީ ދައުވާ ކުރުމަށް ކޯޓަށް ވަނީ ޕެޓިޝަނެއް ހުށައަޅާފަ އެވެ.

ވަކީލު ކްރިސްޓޮފާ އެންތަނީ އޭނާގެ ޕެޓިޝަންގައި ބުނެފައިވަނީ ފޮތުގެ ސުރުޚީގެ ސަބަބުން ނަސާރާ ދީނަށް ގެއްލުންވާ ކަމަށެވެ. އެ ޕެޓިޝަންގައި ބުނެފައި ވަނީ ސުރުޚީގައި "ބައިބަލް" މި ލަފުޒު ބޭނުންކޮށްފައި ވަނީ އަގުހެޔޮކޮށް މަގުބޫލުކަން ހޯދުމުގެ ނިޔަތުގައި ކަމަށް ބެލެވޭ ކަމަށެވެ. އަދި އެ މައްސަލައިގައި ބުނެފައި ދީނަކަށް ނިސްބަތްވާ ބައެެއްގެ ފޮތަށް ކިޔާ ނަން ކަމާ ނުވެސް ގުޅޭ ކަމަކާ ބެހޭ ގޮތުން ލިޔެފައިވާ ފޮތަކަށް ކިޔުމަކީ ވަރަށް ދެވަރުގެ ކަމެއް ކަމަށެވެ.

ޕެޓިޝަނުގައި އެ ނަން ފޮތަށް ކިޔަން ޖެހުނު ސަބަބެއް ސާފުކޮށް ދޭން ޖެހޭނެ ކަމަށް ވެސް ބުނެފައިވެ އެވެ.

މިކަމާ ގުޅިގެން ކަރީނާ އާއި ފޮތުގެ ޓީމަށް ފޮނުވި ނޯޓިހުގައި ވަނީ ފޮތަށް ނަން ދިން ގޮތް ސާފުކޮށް ދޭން އަންގައިފަ އެވެ.

ކަރީނާ ލިޔުނު ފޮތުގެ ބޭރު ގަނޑު

"ކަރީނާ ކަޕޫރް ހާންސް ޕްރެގްނަންސީ ބައިބްލް" ގެ މައްސަލަ ކޯޓަށް ހުށަހެޅި އިރު، މި ފޮތް ނެރުނު އަހަރު ކަމަށްވާ 2021 ގައި ވެސް ނަސާރާ ދީނުގެ ޖަމިއްޔާއެއްގެ ބަޔަކު ފޮތުގެ ނަމުގެ މައްސަލަ ތަހުގީގުކޮށް ދޭން އެދި ފުލުހުންނަށް ހުށަހެޅި އެވެ. ނަމަވެސް ފުލުހުން އެ މައްސަލަ ބަލައިގެންފައެއް ނުވެ އެވެ.