ރާއްޖޭގައި 150 އެނދުގެ ތިން ހޮސްޕިޓަލެއް އަޅަން ސައުދީ ފަންޑު ފޯ ޑިވެލޮޕްމަންޓްގެ ފަރާތުން ރާއްޖެ އަށް 50 މިލިއަން ޑޮލަރު (770 މިލިއަން ރުފިޔާ) ގެ ލޯނެއް ދިނުމުގެ އެއްބަސްވުމުގައި މިއަދު ސޮއިކޮށްފި އެވެ.

ފިނޭންސް މިނިސްޓްރީގައި އޮތް ރަސްމިއްޔާތެއްގައި ރާއްޖޭގެ ފަރާތުން އެއްބަސްވުމުގައި ސޮއިކުރެއްވީ ފިނޭންސް މިނިސްޓަރު ޑރ. މުހައްމަދު ޝަފީގެވެ. ސައުދީ ފަންޑުގެ ފަރާތުން ސޮއިކުރެއްވީ އެ ތަނުގެ ސީއީއޯ ސުލްތާން ބިން އަބްދުއްރަޙްމާން އަލް މަރްޝަދެވެ.

ސައުދީ ފަންޑުގެ ސީއީއޯ ވިދާޅުވީ ސިއްހީ ދާއިރާ އަށް ކުރިއެރުން ގެނައުމަށް ސޮއިކުރި 50 މިލިއަން ޑޮލަރުގެ ލޯނަކީ ތަފާތު ތިން ރަށެއްގައި ތިން ހޮސްޕިޓަލް އިމާރާތް ކުރުމަށް ދެވޭ ލޯން އެހީއެއް ކަމަށެވެ. މިއިން ކޮންމެ ހޮސްޕިޓަލެއްގައި 150 އެނދު ހުންނާނެ ކަމުގައި އޭނާ ވިދާޅުވި އެވެ.

ސުލްތާން ވިދާޅުވީ މި ހޮސްޕިޓަލްތަކުގެ ސަބަބުން ރާއްޖޭގެ ސިއްހީ ދާއިރާ އަށް ކުރިއެރުން ލިބި، ދިވެހިންގެ ދިރިއުޅުމަށް ހެޔޮ ބަދަލުތަކެއް އަންނާނެ ކަމަށް އުންމީދު ކުރައްވާ ކަމަށެވެ.

"ސިއްހީ ދާއިރާގެ މި ޕްރޮޖެކްޓަކީ ހިތާ ވަރަށް ގުޅިފައި އޮތް ކަމެއް. މިއީ ރައްޔިތުންނަށް އުންމީދެއް ގެނުވާނެ އަދި ދުޅަހެޔޮ ސިއްހަތެއްގައި ގިނަ ދުވަހު ހުރުމަށް މެދުވެރިވާނެ ކަމެއް. މި ޕްރޮޖެކްޓްގެ ބައިވެރިއަކަށް ވުމުގެ ފުރުސަތު ލިބުމަކީ ސައުދީ ފަންޑުން ފަހުރުވެރިވާ ކަމެއް،" ސުލްތާން ވިދާޅުވި އެވެ.

ޝަފީގް ވަނީ މިހާތަނަށް އައިިއިރު ސައުދީ އަރަބިއްޔާ އިން ރާއްޖެ އަށް ފޯރުކޮށްދިން އެހީތެރިކަމަށް ޝުކުރު އަދާކުރައްވައިފަ އެވެ. ހާއްސަކޮށް ޑިސެމްބަރު 2004 ވަނަ އަހަރުގެ ސުނާމީ ކާރިސާއާ ގުޅިގެން ފޯރުކޮށްދިން އެހީ ފާހަގަ ކުރެއްވި އެވެ.