މިދިޔަ މަހުގެ 23 އިން ފެށިގެން މިހާތަނަށް އައިއިރު، މަސްވެރިންނަށް ދޭންޖެހޭ 62 މިލިއަން ރުފިޔާ ނުދެވި އެބައޮތް ކަމަށް ފިޝަރީޒްް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

ފިޝަރީޒް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ޝިޔާމް ވިދާޅުވީ މަސްވެރިންނަށް ފައިސާ ދޫކޮށްފައިވަނީ އޭޕްރީލް މަހުގެ 22 ވަނަ ދުވަހާ ހަމައަށް ބޭނި މަހަށް ކަމަށެވެ. އެހެންވެ، އޭޕްރީލް މަހުގެ 23 އިން ފެށިގެން މިއަދާ ހަމައަށް ފައިސާ ދޫނުކޮށް 62 މިލިއަން ރުފިޔާ އެބައޮތް ކަމަށް އޭނާ ވިދާޅުވި އެވެ.

އެންމެ ފަހުން މަސްވެރިންނަށް ދީފައި ވަނީ 22 މިލިއަން ރުފިޔާ އެވެ. އެއީ މިދިޔަ މަހުގެ 22 ގަ އެވެ. އެއާ އެކީގައި މި ސަރުކާރު އައިފަހުން 881 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށް ޝިޔާމް ވިދާޅުވި އެވެ.

މިނިސްޓަރު ވިދާޅުވީ މަސައްކަތް ކުރަނީ މަސްވެރިންނަށް ދޭންޖެހޭ ފައިސާ ވީހާވެސް އަވަހަކަށް ދިނުމަށް ކަމަށެވެ.

"އަޅުގަނޑުމެން އުއްމީދު މި ކުރަނީ ވީހާ ވެސް އަވަހަކަށް، އަދި މަސް ނިމެމުންދާތީ އާ ވެސް އެކީގައި މިފްކޯ އަށް ވެސް މާލީ ގޮތުން ހުންނާނެ މަސް ނިމޭއިރު ހުންނަ އުނދަގުލެއް. އެކަމަކު އަޅުގަނޑު އުއްމީދު މިކުރަނީ ވީހާވެސް އަވަހަކަށް މި ފައިސާ މަސްވެރިންނަށް ދައްކާ ހަލާސް ކުރުމަށް،" ޝިޔާމް ވިދާޅުވި އެވެ.

ޝިޔާމް ވިދާޅުވީ މަސްވެރިންނަށް ދޭން ޖެހޭ ފައިސާ ދިނުމަށް މިފްކޯ އިން ވެސް އަދި ސަރުކާރުން ވެސް މަސައްކަތްތަކެއް ކުރަމުންދާ ކަމަށެވެ.

މަސްވެރިން ކިރާ މަހަށް ފައިސާ ލިބުމުގެ ދަތިކަން ހައްލުކޮށް، 48 ގަޑިއިރުގެ ތެރޭގައި މަހަށް ފައިސާ ދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.

މަސްވެރިންނަށް ދޭންޖެހޭ ފައިސާ ނުދީގެން މިދިޔަ ފެބްރުއަރީ މަހު މަސްވެރިން ވަނީ ގއ. ކޫއްޑޫގައި މުޒާހަރާކޮށްފަ އެވެ.