އައްޑޫގެ ގުޅިފައިވާ ރަށްތަކަށް ސަޕްލައި ފެން ފޯރުކޮށްދިނުމުގައި ދަތިތަކާ ކުރިމަތިވެފައިވާ މައްސަލަ ސަރުކާރުގެ ސަމާލުކަމަށް ގެނައުމަށް މަޖިލީހަށް ކުއްލި މައްސަލައެއް މިއަދު ހުށަހަޅައިފި އެވެ.

އައްޑޫ ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް ހުށަހެޅުއްވި ކުއްލި މައްސަލައަކީ މި ދައުރުގެ ފުރަތަމަ ކުއްލި މައްސަލަ އެވެ. ސަރުކާރަށް ސުޕަމެޖޯރިޓީ އޮންނަ މަޖިލީހުން ވަނީ މި މައްސަލަ ބަލައިގަތުމަށް ވޯޓު ދީފަ އެވެ.

ނާޒިލްގެ ކުއްލި މައްސަލައިގައި ވަނީ ސާފު ފެން ފޯރުކޮށްދިނުމުގެ ހިދުމަތަކީ އަސާސީ ހިދުމަތެއްކަން ފާހަގަކުރައްވައި، ދިމާވެފައިވާ ދަތިތައް މިހާރުން މިހާރަށް ހައްލުކުރަން ގޮވާލައިފަ އެވެ.

މައްސަލަ އަށް ބަހުސް ކުރައްވަމުން ނާޒިލް ވިދާޅުވި ގޮތުގައި މި މައްސަލަ ހައްލު ނުވެ ދިގު ލައިގެން ދިއުމުގެ ސަބަބުން އާންމު ފަރުދުންގެ އިތުރުން ވިޔަފާރިތަކަށް ވެސް އޭގެ ގެއްލުން ލިބެމުން އަންނަ ކަމަށެވެ.

20 ވަނަ ރައްޔިތުންގެ މަޖިލިސްގެ ޖަލްސާގެ ތެރެއިން.... ފޮޓޯ: މަޖިލިސް

އައްޑޫއަށް ފެން ނުލިބުމުގެ މައްސަލައަށް ޒިންމާވާނެ ފަރާތަކީ ކޮބައިކަން ވެސް ރައްޔިތުންނަށް ނޭނގެ ކަމަށް ނާޒިލް ވިދާޅުވި އެވެ. އެހެންވެ ކުއްލި މައްސަލައިގައި އޭނާ ސަރުކާރަށް ގޮވާލެއްވީ، މި މައްސަލަ ވަގުތުން ވަގުތަށް ހައްލުކޮށްދިނުމަށެވެ.

މި މައްސަލާގައި ބަހުސް ކުރަމުން ސަރުކާރަށް ތާއިދު ކުރައްވާ މެންބަރުން ވިދާޅުވީ އައްޑޫގެ ފެނުގެ މައްސަލަ އެ ހާލަތަށް ދިޔައީ ނިމިގެން ދިޔަ އެމްޑީޕީގެ ސަރުކާރުން އަޅާނުލާ އޮތުމުން ކަމަށެވެ.

އެމްޑީޕީ ވެރިކަމުގައި މި މައްސަލަ ހައްލު ކުރަން މަސައްކަތް ނުކުރީ ކީއްވެގެންތޯ ސަރުކާރުން ތާއީދު ކުރައްވާ މެންބަރު ވަނީ ސުވާލު އުފައްދަވައިފަ އެވެ. ފެނުގެ ހިދުމަތް ކެނޑެން ދިމާވި ސަބަބަކީ ކޮބައިތޯ ބަލާލަން ޖެހޭކަން ވެސް އެމެންބަރުން ފާހަގަކުރެއްވި އެވެ.

މަޖިލީހަށް މި މައްސަލަ ހުށަހެޅިއިރު، އައްޑޫގެ ފެނުގެ ނިޒާމް ރަނގަޅުކުރުމުގެ ޕްރޮޖެކްޓް، މި ސަރުކާރުން ވަނީ އެމްޑަބްލިއުއެސްސީއާ ހަވާލުކޮށްފަ އެވެ.