ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ކުރިއަށް ގެންދިޔަ "ގެދޮރުވެރިޔާ" ސްކީމުގެ ދަށުން ފްލެޓް ދިނުމުގެ ކަންތައްތަކުގައި އިސްކޮށް މަސައްކަތް ކުރި ކޮމެޓީގައި ހިމެނިވަޑައިގެންނެވި ބޭފުޅުންގެ ގެތަކަށް އެންޓި-ކޮރަޕްޝަން ކޮމިޝަން (އޭސީސީ) އިން ވަދެ ބަލައި ފާސްކުރަން ފަށައިފި އެވެ.

އޭސީސީން ކުރީގެ ފުލެޓް ކޮމިޓީގެ މެމްބަރުން ދިރިއުޅޭ ގޭތަކަށް ވަދެފައިވަނީ ކޯޓު އަމުރެއްގެ ދަށުންނެވެ.

އޭސީސީން ބަލާ ފާސްކުރާ ގެތަކުގެ ތެރޭގައި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާއި އަހުމަދު ވިސާން ނަސީމާއި، މުހައްމަދު އާރިފް، އަދި ލިރުޣާމް ވަހީދު އުޅުއްވާ ތަންތަން ހިމެނެ އެވެ.

ގެދޮރުވެރިޔާ ފްލެޓްތައް ލިބޭ މީހުންގެ ދާއިމީ ލިސްޓެއް، މިދިޔަ ސަރުކާރު ނިމެން ދެ ދުވަހަށްވެފައި އޮއްވައި ނެރުމުން އޭސީސީން ވަނީ ފްލެޓް ދޫކުރުން ހުއްޓުވައިފަ އެވެ.

އޭސީސީން ބުނީ ހައުސިން މިނިސްޓްރީގެ ކުރީގެ ފްލެޓް ކޮމީޓީގެ ވެރިންގެ ގެތައް މިއަދު ފާސްކުރަމުން އަންނަނީ މިހާރު ތަހުގީގު ކުރަން ފަށާފައިވާ ގެދޮރުވެރިޔާ ސްކީމުގެ 4،000 ފްލެޓު ދޫކުރި ގޮތުގެ މައްސަލައާ ގުޅޭ ގޮތުން ކަމަށެވެ. އެގޮތުން ކޯޓު އަމުރުގެ ދަށުން ފާސްކުރަމުން އަންނަނީ މައްސަލައާ ގުޅުންހުރި ބައެއް ފަރާތްތަކާ ގުޅުންހުރި ބައެއް ތަންތަން ކަމަށް ބުންޏެވެ.

ގެދޮރުވެރިޔާ ސްކީމްގެ ދަށުން 4،000 ފުލެޓް ދިނުމަށް ޝަރުތު ހަމަވާ މީހުންގެ ލިސްޓު އާންމު ކުރުމުން، ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އޭސީސީން އޮތީ ޖިނާއީ ތަހުގީގެއް ވެސް ފަށައިފަ އެވެ.

އެ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓް ދޫކުރުން މަޑު ޖެހިފައި އޮތުމަށް ފަހު މިދިޔަ އެޕްރީލް މަހުގެ 1 ވަނަ ދުވަހު އޭސީސީން ވަނީ ބައެއް ކަންތަކަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފަ އެވެ.

ހުއްދަ ދިން ނަމަވެސް އޭސީސީން ބުނެފައި ވަނީ 4،000 ފުލެޓު ލިބުނު މީހުންގެ ތެރެއިން 59.6 ޕަސެންޓް މީހުންގެ ޝަރުތު ހަމަނުވާ ކަމަށެވެ.