މ. މުލިއަށް ކަރަންޓް ނުލިބޭތާ އެއް ދުވަސް ވެއްޖެ އެވެ.

މުލީ ކައުންސިލްގެ ރައީސް ޝައްމޫނު ރަމީޒު ވިދާޅުވީ މުލިން ކަރަންޓު ކެނޑުނީ އިއްޔެ ހެނދުނު 8:15 ގައި ކަމަށެވެ.

ފެނަކައިން މައުލޫމާތި ދިން ގޮތުގައި ކަރަންޓު ކެނޑުނީ ލޯޑު ބޮޑުވެގެންކަމަށާއި އަދި މައްސަލަ ހައްލުކުރުމަށް އިއްޔެއިން ފެށިގެން މަސައްކަތްކުރަމުންދާކަން އެ އެކުންފުނިން ބުނެފައިވާކަމަށް ޝައްމޫނު ވިދާޅުވި އެވެ.

އެހެންނަމަވެސް އެކަމަށް އަދިވެސް ހައްލެއް ލިބިފައިނުވާ ކަމަށާއި ރަށަށް ކަރަންޓް ލިބޭނެ އިރެއް އަދިވެސް ނޭނގޭ ކަމަށް އޭނާ ވިދާޅުވި އެވެ.

ރައްޔިތުންނަށް ހިދުމަތް ދޭ ގިނަ ތަންތަނުގެ މަސައްކަތްތައް ވެސް ވަނީ ހުއްޓިފައެވެ. އެގޮތުން ބޭންކުގެ ހިދުމަތްތައް ވެސް ހުއްޓި އޭޓީއެމްގެ ހިދުމަތް ވެސް ވަނީ މެދުކެނޑިފަ އެވެ. މިއަދު ހެނދުނު މ. އަތޮޅު ކައުންސިލްގެ ހިދުމަތްތައް ވެސް ވަގުތީ ގޮތުން ވަނީ މެދުކަނޑާލާފަ އެވެ. އެރަށު ސްކޫލުގެ ކިޔެވުން ވެސް ވަނީ މެދުކަނޑައިލައިފަ އެވެ.

މިކަމާ ގުޅިގެން ފެނަކައިން ބުނީ މުޅި ރަށުން ކަރަންޓް ކެނޑުނީ ކަރަންޓު ދިނުމަށް ބެހެއްޓިފައި ހުރި ދެ ޖަނަރޭޓަރަށް ދިމާވި މައްސަލައަކާ ގުޅިގެން ކަމަށެވެ.

ފެނަކައިން ބުނީ މިހާރު އިތުރު 600 ކިލޯވޮޓްގެ އާ ޖަނެރޭޓަރެއް އެ ރަށަށް ގެންގޮސް ޖަނަރޭޓަރު އިންސްޓޯލްކޮށްގެން ކަރަންޓު ދިނުމަށް މަސައްކަތް ކުރެވެމުންދާ ކަމަށެވެ.

ކަރަންޓް ކެނޑުނުތާ ގިނައިރުވުމުން އެރަށު ގޭގޭ ފުރިޖްތަކުގައި ހުރި މަސްފަދަ ތަކެތި ހަލާކުވެ، ފިހާރަތަކުގައި ވިއްކަން ހުރި ފިނި ކުރިތަކެތި ހަލާކުވެ ވިޔަފާރިތަކަށް ވަނީ މާލީގޮތުން ބޮޑު ގެއްލުމެއް ލިބިފަ އެވެ.