އާންމު ދިވެހި ރައްޔިތުންނަށް ކެތް ނުކުރެވޭ ވަރަށް، މާލޭގެ ސަރަހައްދުގެ ޓްރެފިކް ގޯސްވުމުގެ ޒިންމާ ނަގަން ޖެހޭނީ ކުރީ ސަރުކާރުންކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެ އެވެ.

މިދުވަސްވަރު ގަވާއިދާ ހިލާފަށް ޕާކުކޮށްފައިވާ އުޅަނދުތަކާއި އެހެން ޒޯންތަކުގައި ރަޖިސްޓްރީކޮށްފައިވާ، މާލޭ އޭރިއާގައި ޕާކްކޮށްފައިވާ އުޅަނދުތައް ޓޯ ކުރަމުން ގެންދިއުމާ ގުޅިގެން ބައެއް ފަރާތްތަކުންދަނީ ނުރުހުން ފާޅުކޮށް މުޒާހަރާ ކުރަމުންނެވެ.

މި މައްސަލައާ ގުޅިގެން ސަންގު ޓީވީގެ ޕްރޮގްރާމެއްގައި ވާހަކަ ދައްކަވަމުން އަމީން ވިދާޅުވީ ގަވައިދާ ހިލާފަށް ޕާކު ކުރުމުން އެކަމަށް އެއްވެސް ފިޔަވަޅެއް ނާޅާ އެއީ އާދައިގެ ކަމެއްގެ ގޮތުގައި ހެދީ ކުރީ ސަރުކާރުތަކުން ކަމަށެވެ. އަދި ގަރާޖު ސިޓީގެ މައްސަލަ ބޮޑުވެ، އެއްވެސް ގަރާޖެއް ނެތި މާލޭގެ މަގުތަކުގައި ވެހިކަލްތައް ގިނަވީވެސް އެކަމުގެ ސަބަބުން ކަމަށް އޭނާ ވިދާޅުވި އެވެ.

އަމީން ވިދާޅުވީ މިހާރު ވެހިކަލް ބާއްވާނެ ގަރާޖެއް ނުދައްވާ ވެހިކަލް އެތެރެ ނުކުރެވޭނެ ކަމަށެވެ. އުޅަނދު ރަޖިސްޓްރީކުރުމުގެ ގަވާއިދާއި އެއްގޮތަށް އުޅަނދު ބޭއްވޭގޮތަށް ހުރިތަނެއްތޯ ބަލުމާއެކު ވެރިފަރާތުގެ ކޮންސެންޓް ވެރިފިކޭޝަން ފުރިހަމަކުރޭތޯ ކަށަވަރު ކުރާކަމަށް އޭނާ ވިދާޅުވި އެވެ.

އަމީން ވިދާޅުވީ މި މައްސަލަ ހައްލުވާނީ ހުރިހާ ރައްޔިތުންގެ ވެސް މަސްލަހަތު އިސްކޮށްގެން ކަމަށެވެ.

މާލެ ސަރަޙައްދުގައި 118,000 އަށްވުރެ ގިނަ އުޅަނދު ރަޖިސްޓްރީ ކޮށްފައިވާއިރު، އެކަކުގެ ނަމުގައި ވެސް ހާހަކަށް ވުރެ ގިނަ ވެހިކަލް ރެޖިސްޓްރީކޮށްފައި ވާކަމަށް ދާދިފަހުން ސަރުކާރުން ވަނީ ހާމަކޮށްފަ އެވެ.

އުޅަނދުތައް ޕާކްކުރާނެ ތަން ނުދައްކާ ޓޯ ކުރަމުންދާތީ ފާއިތުވި ތިން ދުވަހު މާލެ އާ ހުޅުމާލެގެ އެކި ސަރަހައްދު ތަކުގައި ދަނީ މުޒާހަރާ ކުރަމުންނެވެ. މީގެ އިތުރުން ޓްރާންސްޕޯޓް މިނިސްޓްރީން ދާދިފަހުން އިފްތިތާހު ކުރި މާލެފެހި ޕްރޮގްރާމްގެ ތެރޭގައި ސަރުކާރުން ޓެކްސީ ހިދުމަތް ފެށުމަށް ހިމަނާފައިވުމުން ޓެކްސީ ޑްރައިވަރުންވެސް ދަނީ މުޒާހަރާ ކުރަމުންނެވެ.

ރައީސް މުއިއްޒު މާލެ ސިޓީ މޭޔަރަކަށް ހުންނެވި ދުވަސްވަރު، އާންމުންގެ އުޅަނދުތައް ޕާކްކުރާ ގިނަ ސަރަހައްދުތަކެއް ޕާކިންއަށް ވިއްކާފައިވާކަމަށްވެސް ބައެއް ފަރާތްތަކުން ވަނީ ތުހުމަތުކޮށްފަ އެވެ.

ރިޔާސީ އިންތިހާބުގެ ކެމްޕޭން ދުވަސްވަރު ރައީސް މުއިއްޒު ވިދާޅުވެފައިވަނީ ޕާކް ކުރާނެ ތަނެއް ނުދައްކާ ޕާކިން ސްޓިކާ ނުޖައްސަވާނެ ކަމަށެވެ. ނަމަވެސް ވެރިކަމަށް ވަޑައިގެން ސްޓިކާ ޖެހުމުގެ ބަދަލުގައި ވެހިކަލްތައް ޓޯކުރުން އިންތިހާއަށް އިތުރުވެ، ފެނިގެންދަނީ މިކަން ރައްޔިތުންނަށް ބޮޑު ތަކްލީފަކަށް ވެފައިވާ މަންޒަރެވެ. ސަރުކާރަށް 8 މަސް ވީއިރު މިހާތަނަށް ޕާކިން މައްސަލައަށް އަދި ވެހިކަލް އިތުރުވުމުގެ މައްސަލައަށް ހައްލު ހޯދައިދިނުމަށް އެއްވެސް ކަމެއް ކުރެވިފާނުވެ އެވެ.