"ބިގް ބޮސް އޯޓީޓީ" ސީޒަން ތިނެއްގެ މަޝްހޫރު ޓީވީ ބަތަލާ ސަނާ މަކްބުލް ހޯދައިފި އެވެ.

ސަނާ "ބިގް ބޮސް" ގެ ޓްރޮފީ އާއި އިނާމަކަށް ލިބުނު 25 ލައްކަ ރުޕީސް ކާބިޔާބުކުރީ ގަދަ ތިނަކަށް ގޮސް މަޝްހޫރު ބޮލީވުޑް އެކްޓަރު ރަންވީރު ޝޯރޭ އާއި ނައީޒީ ބަލިކުރުމަށް ފަހު އެވެ.

މި ސީޒަން ކާމިޔާބުކުރާނެ ކަމަށް ގިނަ ބަޔަކު ލަފާކުރި ބޮލީވުޑް އެކްޓަރު ރަންވީރު ޝޯރޭ ތިޔައީ ތިން ވަނަ އަށެވެ. އަދި ދެވަނަ ލިބުނީ ނައީޒީ އަށެވެ.

ހަ ހަފްތާއަށް ކުރިއަށް ގެންދިޔަ މިފަހަރުގެ ސީޒަންގައި ގިނަ ގޮންޖެހުންތަކާ ކުރިމަތިލައި، ޝޯ ކާމިޔާބުކުރި ސަނާ އަކީ ޝޯގައި ބައިވެރިވި އެހެން ބައިވެރިންގެ ފަރާތުން ނަފުރަތު ލިބިގެންދިޔަ ބައިވެރިއެކެވެ. އެގޮތުން ގިނަ ފަހަރު ޝޯއިން ބޭރުކޮށްލުމަށް އޭނާ ނޮމިނޭޓްކޮށްފައިވެ އެވެ.

ސަނާ އާއި ނައީޒީ

އެހެން ސީޒަންތަކާއި ހިލާފަށް މިފަހަރުގެ ސީޒަންގައި ވަނީ ބިގްބޮސް ގޭގައި ބައިވެރިންނަށް ފޯނު ބޭނުންކުރުމުގެ ފުރުސަތު ލިބިގެން ގޮސްފަ އެވެ. އަދި މިޝޯގައި "ބަހަރުވާލާ" ނަމުގައި ވަކި ބައިވެރިޔަކު ކޮންމެ ހަފްތާއަކު ބިގްބޮސް ކަނޑައަޅަ އެވެ. އަދި އެބައިވެރިޔަކަށް ބިގްބޮސް ގެއިން ބޭރުގައި ހިނގާ ކަންތައްތަކުގެ މައުލޫމާތު ފޯރުކޮށްދެ އެވެ.

ފައިނަލަށް ދިޔަ ފަސް މީހުންގެ ތެރެއިން އެންމެ މަދުން ވޯޓު ލިބުނު ތިން މީހުން ކަޓުވާލުމަށްފަހު އެންމެ ފަހުން ތިބޭ ދެ ބައިވެރިންނަށް ވޯޓު ލުމަށް އަލުން ހުޅުވާލުމެވެ.

ފައިނަލް ދެ ޖާގައިގައި ތިބީ ސަނާ އާއި ނައީޒީ ކަމަށް ވާތީ މި ދެ ބައިވެރިންނަށް އަލުން ވޯޓުލާން ހުޅުވާލީ ޝޯގެ ވަކި ހިސާބަކުންނެވެ. އެއްވަނަ އަށް ދިޔަ ފަރާތް އިއުލާން ކުރީ ލިބުނު ވޯޓު ވަގުތުން ގުނުމަށް ފަހުގަ އެވެ.

މިފަހަރުގެ ސީޒަން އަނިލް ކަޕޫރު ހޯސްޓްކޮށްފައިވާއިރު މިސީޒަން ދައްކަން ފެށީ މިދިޔަ ޖޫން މަހުގެ 23 ވަނަ ދުވަހު އެވެ. މި ސީޒަން ވެސް ދިޔައީ ވަރަށް ވާދަވެރިކޮށެވެ. މި ސީޒަން ފެށި އިރު 16 ބައިވެރިން ތިއްބެވެ.