ސޯޝަލް ހައުސިންގެ ފްލެޓްތަކަށް ކުލި ނުދައްކާނަމަ ފިޔަވަޅު އަޅާނެ ކަމުގެ އިންޒާރު ހައުސިން މިނިސްޓްރީން ދީފި އެވެ.

ހައުސިން މިނިސްޓްރީން މިރޭ ނެރުނު ބަޔާނެއްގައި ވަނީ ސަރުކާރުގެ ބޯހިޔާވަހިކަމުގެ ސިޔާސަތާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދާ އެއްގޮތަށް މާލެ ސަރަހައްދު އަދި ރާއްޖޭގެ އެކި ސަރަހައްދުތަކުގައި ތަރައްގީކޮށްފައިވާ ހައުސިން ޔުނިޓްތަކުން މަހުން މަހަށް ދައްކަންޖެހޭ ފައިސާގެ 20 ޕަސެންޓް މައާފްކޮށްދީފައިވާ ކަމަށެވެ.

މިދިޔަ ޖެނުއަރީ މަހުން ފެށިގެން މަހުން މަހަށް ދައްކަންޖެހޭ ފައިސާ ގަވާއިދާ އެއްގޮތަށް ދެއްކުމަށް ޔުނިޓްގެ ވެރިފަރާތްތަކަށް އެ މިނިސްޓްރީން އަންގާފައިވާނެ ކަމަށް ހައުސިން މިނިސްޓްރީގެ ބަޔާނުގައިވެ އެވެ.

ނަމަވެސް ގިނަ ފަރާތްތަކުން މަހުން މަހަށް ދައްކަންޖެހޭ ފައިސާ ގަވާއިދުން ދައްކަމުން ނުދާތީ ގަވާއިދުން ފައިސާ ދެއްކުމަށް އެ މިނިސްޓްރީން ވަނީ އިލްތިމާސްކޮށްފަ އެވެ.

"އަދި ގަވާއިދުން ފައިސާ ދައްކަމުން ނުދާ ފަރާތްތަކާއި، ޔުނިޓް ކަނޑައަޅާފައިވާ ބޭނުން ނޫން އެހެން ބޭނުންތަކަށް ޔުނިޓްތައް ބޭނުންކުރުމާއި، ގަވާއިދާ ހިލާފަށް ތަނަށް ބަދަލު ގެނައުމާއި ކުއްޔަށް ދިނުމާ ގުޅޭ ކަންކަން މި މިނިސްޓްރީން ބަލަމުންދާ ވާހަކަ ދަންނަވަމެވެ. މިގޮތުން ގަވާއިދާ ހިލާފަށް އަމަލުކުރަމުންދާ ފަރާތްތަކާ މެދު އެއްބަސްވުމާ އެއްގޮތަށް ފިޔަވަޅު އަޅާނެ ވާހަކަ ދަންނަވަމެވެ،" ހައުސިން މިނިސްޓްރީގެ ބަޔާނުގައިވެ އެވެ.