އަންހެނެއްގެ ކަރުގައި ވަޅިޖައްސާ ރަހީނުކުރީ އަދަބު ލުއިކޮށް ދޫކޮށްލި މީހެއްކަން އެނގިއްޖެ އެވެ.

މާލޭގައި ރޭ އަންހެނެއްގެ ކަރުގައި ވަޅިޖައްސާ ރަހީނުކޮށް ފުލުހުންނަށް އިންޒާރުދިން މީހާއަކީ މަސްތުވާތަކެތީގެ މައްސަލައެއްގައި ޖަލުގައި ހުއްޓާ އަދަބު ލުއިކޮށް ދޫކޮށްލި މީހެއްކަން ވަނީ އެނގިފަ އެވެ.

މާފުދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން، ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި ހުކުމް ލުއިކޮށް އޭނާ ދޫކޮށްލާފައި ވަނީ 2022 ވަނަ އަހަރުގެ ސެޕްޓެމްބަރު ދެވަނަ ދުވަހު އެވެ. އޭނާ ދޫކޮށްލީ ޝަރުތުތަކާ އެކު އެވެ.

ރޭ ރަހީނުކޮށްފައިވަނީ އެ ފިރިހެންމީހާ ލޯބީގެ ގޮތުން ގުޅިގެން އުޅުނު އަންހެނެއްކަމަށް ބައެއް ފަރާތްތަކުން ބުނެފައިވެ އެވެ. އެދެމީހުން ދެމެދުގައި ހިނގި ޒުވާބަކަށްފަހު އޭނާ ވަނީ އަންހެން މީހާގެ ކަރުގައި ވަޅި ޖައްސައިގެން ގެއިން ނެރެ ސައިކަލްގައި ދިއުމަށް މަސައްކަތް ކޮށްފައެވެ.

ނަމަވެސް ވަކި ހިސާބަކުން ފުލުހުން ވަނީ އޭނާއަށް މުގުރުން ހަމަލާދީ އަންހެންމީހާ ސަލާމަތްކޮށްފަ އެވެ. ސަލާމަތް ކުރަން އުޅުމުގެ ތެރޭގައި ދެމީހުނަށްވެސް ކޮންމެވެސް ވަރަކަށް އަނިޔާލިބުނެވެ. ފިރިހެންމީހާއަށް ލިބުނު އަނިޔާއަށް އޭޑީކޭގައި ފަރުވާދީފައިވާއިރު، އަންހެންމީހާ އަށް ފަރުވާ ދިނުމަށްފަހު ވަނީ ދޫކޮށްލާފަ އެވެ.

މި މައްސަލައާ ގުޅޭ މައުލޫމާތު ހިއްސާކުރަމުން ފުލުހުން ބުނީ އަންހެން މީހާއަށް ގޭތެރޭގައި އަނިޔާކޮށް މަގުމައްޗަށް ނެރެ ވެސް އަނިޔާ ކޮށްފައިވާ ކަމަށެވެ.

ފުލުހުން އަންހެން މީހާ ސަލާމަތްކުރަން އުޅެފިނަމަ މަރާލާނެ ކަމަށް ބުނެ އޭނާ ހިފަހައްޓައިގެން ހުރި ފިރިހެން މީހާ އެ އަންހެން މީހާގެ ކަރުގައި ވަޅިޖައްސާ އިންޒާރު ދިން ކަމަށް ވެސް ފުލުހުން ވަނީ ބުނެފަ އެވެ.