މާލޭގައި ރޭ ވަޅިން ބިރު ދައްކައި ރަހީނުކުރި މީހާ ސަލާމަތްކުރަން ހަރަކާތްތެރިވި ފުލުހުންނާ ކޮމިޝަނަ އޮފް ޕޮލިސް އަލީ ޝުޖާއު ބައްދަލުކުރައްވައި އެ މީހުންގެ މަސައްކަތަށް ތައުރީފު ކުރައްވައިފި އެވެ.

އިސްކަންދަރު ބިލްޑިންގައި ބޭއްވި މިއަދު މި ބައްދަލުވުމުގައި ވާހަކަ ދައްކަވަމުން ކޮމިޝަނަރު އޮފް ޕޮލިސް ވިދާޅުވީ މިއީ އަލަށް ދިމާވި ނުރައްކާތެރި ހާދިސާއެއް ނަމަވެސް ވަރަށް ކާމިޔާބުކަމާއި ޕްރޮފެޝަނަލްކަމާއެކު "ތުރެޓް ނިއުޓްރަލައިޒް" ކޮށްފައިވާ ކަމަށެވެ. އަދި މިއީ ކާމިޔާބު މަސައްކަތެއްކަމާއި އެކަމަށްޓަކައި ހަރަކާތްތެރިވި އެންމެހާ ފަރާތްތަކަށް އޭނާ ޝުކުރު ދެންނެވި އެވެ.

ކޮމިޝަނަރު އިތުރަށް ފާހަގަކުރެއްވި ގޮތުގައި ރޭގެ އޮޕަރޭޝަންގައި ކޮމިއުނިކޭޝަން ވަރަށް ރަނގަޅަށް ދިޔަކަމާއި މިއީ ކޯޑިނޭޝަން ރަނގަޅު އޮޕަރޭޝަނެއްކަން ފާހަގަކުރެއްވި އެވެ. އޭގެ އިތުރުން، ހާލަތާއި ނުކުމެދާނެ ނަތީޖާއަށް ބަލާއިރު "ނިއުޓްރަލައިޒް" ކުރުމުގައި ނިންމި ނިންމުން ރަނގަޅުކަން ވެސް ކޮމިޝަނަރު ފާހަގަ ކުރެއްވި އެވެ. އަދި ﷲގެ އިރާދާފުޅާއެކު ވިކްޓިމްއަށް އަދި ސަސްޕެކްޓަށް ވެސް ބޮޑު އަނިޔާއެއް ނުވެ ނިއުޓްރަލައިޒް ކުރެވުނު ކަން ކޮމިޝަނަރު ފާހަގަ ކުރެއްވި އެވެ.

ކޮމިޝަނަރު އިތުރަށް ވިދާޅުވީ މި ހާދިސާގައި ފުލުހުން އަމަލުކޮށްފައިވާ ގޮތާމެދު ފަހުރުވެރިވާ ކަމަށާއި، މިއީ ރައްޔިތެއްގެ ފުރާނަ ސަލާމަތް ކުރަން ކުރަންޖެހޭ މަސައްކަތެއް ކުރުމުގައި ފުލުހުން ޖެހިލުން ނުވާނެކަމުގެ މިސާލެއް ކަމަށެވެ. އަދި ރައްޔިތުންގެ ތައުރީފް ފުލުހުން ރޭ ހިންގި އޮޕަރޭޝަނަށް ލިބެމުން ދާކަމަށާއި އިތުރަށް ރަނގަޅު ކުރުމަށް ހިޔާލުތައް ވެސް ލިބެމުންދާ ކަމަށާއި އެކަންކަން ބަލައިގަންނަ ކަމަށް ވެސް ޝުޖާއު ވިދާޅުވި އެވެ.

މީގެ އިތުރުން މިފަދަ ކަންކަމަށް ތައްޔާރުވުމުގެ ގޮތުން އިތުރު ތަމްރީންތައް ހަދަމުން ގެންދިއުމުގެ މުހިއްމުކަން ބޮޑު ކަމަށާއި ހުރިހާ ފުލުހުން ވެސް އެންމެ އިސްކަމެއް ދޭ ކަމަކީ ރައްޔިތުންނަށް ހިދުމަތް ކުރުން ކަމަށް ހެދުމަށް އޭނާ އެދިވަޑައިގެންނެވި އެވެ.

ރަހީނު ކުރި މީހާއަށް ލިބުނު އަނިޔާއަށް ފަރުވާދިނުމަށް ފަހު މިހާރު ވަނީ ހޮސްޕިޓަލުން ދޫކޮށްލާފަ އެވެ. އޭނާ މިހާރު ހުރީ ފުލުހުންގެ ބެލުމުގެ ދަށުގަ އެވެ. މި މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުން ގެންދާ ކަމަށް ފުލުހުން ބުނެ އެވެ.

ރޭ ހިނގި ރަހީނުކުރުމުގެ ހާދިސާގެ ވިކްޓިމްގެ ހާލު ކޮމިޝަނަރު އޮފް ޕޮލިސް މިއަދު ވަނީ ބައްލަވާފަ އެވެ.