ރާއްޖޭގައި ހުންނަ ޔުނައިޓެޑް އަރަބް އެމިރޭޓްސް (ޔޫއޭއީ) އެމްބަސީ ހިންގި އިމާރާތުގެ ކުއްޔަށް 1.4 މިލިއަން ރުފިޔާ ހޯދަން އެ އެމްބަސީއާ ދެކޮޅަށް ދައުވާކުރި ނަމަވެސް އެމްބަސީއަށް ޑިޕްލޮމެޓިކް އިމްތިޔާޒް ލިބިގެންވާތީ އެ މައްސަލަ ނުބެލޭނެ ކަމަށް ސިވިލް ކޯޓުން ހުކުމްކޮށްފި އެވެ.

ޔޫއޭއީ އެމްބަސީއާ ދެކޮޅަށް ދައުވާކުރީ ގ. ނިއުޝާގެ ތިން ފަންގިފިލާއެއްގައި މެއި, 2020 އިން ފެށިގެން އޮކްޓޯބަރު, 2022 ގެ ނިޔަލަށް ޔޫއޭއީ އެމްބަސީގެ އޮފީސް ހިންގިއިރު އެތަނުގެ ކުލި ދައްކާފައި ނުވާތީ އާއި ނޯޓިހެއް ދިނުމެއް ނެތި އެއްބަސްވުން އުވާލާފައިވާތީ 92,000 އަށް ވުރެ ގިނަ ޑޮލަރު (1.4 މިލިއަން ރުފިޔާ) ހޯދުމަށެވެ. އެ ދައުވާކުރީ އެ އިމާރާތުގެ ވެރިފަރާތުންނެވެ.

ސިވިލް ކޯޓުން މިދިޔަ ބުރާސްފަތި ދުވަހު ކުރި ހުކުމުގައިވަނީ އެމްބަސީތަކާއި ހައިކޮމިޝަންތަކަކީ ވިއެނާ ކޮންވެންޝަން އޮފް ޑިޕްލޮމެޓިކް ރިލޭޝަން މުއާހަދާގެ ދަށުން އިމްތިޔާޒު ލިބިގެންވާ ތަންތަން ކަމަށެވެ. އަދި ދިވެހި ސަރުކާރުގެ ފަރާތުން ޑިޕްލޮމެޓިކް އިމްތިޔާޒު ދީފައިވާ ފަރާތްތަކުގެ މައްޗަށް ރާއްޖޭގެ ކޯޓެއްގައި ދައުވާ ނުކުރެވޭނެ ކަމަށް މަދަނީ އިޖްރައާތުގެ ގާނޫނުގައި ބުނެފައިވާ ކަމަށް އެ ހުކުމުގައިވެ އެވެ.

އެހެންކަމުން ހުކުމުގައިވަނީ ޔޫއޭއީ އެމްބަސީއަކީ ޑިޕްލޮމެޓިކް އިމްތިޔާޒު ލިބިފައިވާ ތަނަކަށް ވާތީ އެ މައްސަލަ ނުބެލޭނެ ކަމަށެވެ.

ރާއްޖޭގައި ހުންނަ އިންޑިއާ އެމްބަސީގެ އިމާރާތަށް ކުލި ނުދެއްކި މައްސަލައެއް ވެސް ކުރިން ފެންމަތިވި އެވެ. އެ މައްސަލާގައި ސުޕްރީމް ކޯޓުން ވެސް ނިންމާފައި އޮތީ ބޭރުގެ އެމްބަސީތަކާ ދެކޮޅަށް ރާއްޖޭގައި ދައުވާ ނުކުރެވޭނެ ކަމަށެވެ.