ރާއްޖޭގެ ކަނޑުތަކުގެ ސިފަތަކާއި ކަނޑުގެ ދިރުންތައް ދެނެގަނެ، ދިރާސާ ކުރުމަށް އިންޑިއާއާ އެކު ހަދާފައިވާ ހައިޑްރޯގްރަފީ އެއްބަސްވުން ދިވެހި ސަރުކާރުން އާ ނުކުރަން ނިންމާފައިވީ ނަމަވެސް ހައިޑްރޮގްރަފީގެ ދާއިރާއިން ދެގައުމުގެ ދެމެދު އެެއްބާރުލުން އިތުރުކުރާނެ ކަމަށް އިންޑިއާގެ ބޮޑުވަޒީރު ނަރެންދުރާ މޯދީ މިއަދު ވިދާޅުވެއްޖެ އެވެ.

ރައީސް ޑރ. މުހައްމަދު އިންޑިއާ އަށް ކުރައްވާ ދަތުރުގައި ދެ ގައުމުގެ ރަސްމީ ވާހަކަތަކަށް ފަހު ދެއްވި ގުޅިފައިވާ ބަޔާނުގައި މޯދީ ވިދާޅުވީ ދިވެހި ސިފައިންގެ ގާބިލުކަން އިތުރުކުރުމަށް އިންޑިއާ އިން ދޭ އެއްބާރުލުން އިތުރުކުރާނެ ކަމަށާއި ދިފާއީ ގޮތުން ތަފާތު ގިނަ ދާއިރާތަކުން ރައީސް މުއިއްޒާ އެކު މަޝްވަރާތައް ކުރައްވާފައިވާނެ ކަމަށެވެ. އެ ގޮތުން އިންޑިއާ ކަނޑުގެ ސަރަހައްދުގެ ހަމަޖެހުމާއި ކުރިއެރުމަށްޓަކައި ދެ ގައުމު އެކުގައި މަސައްކަތް ކުރާނާނެ ކަމަށާއި ހައިޑްރޮގްރަފީ އާއި ޑިޒާސްޓާ ރެސްޕޮންސްގެ ދާއިރާއިން އެއްބާރުލުން އިތުރުކުރާނެ ކަމަށް މޯދީ ވިދާޅުވި އެވެ.

މޯދީ މި މޭރުމުން ވާހަކަ ދެއްކެވި އިރު ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ރާއްޖޭގެ ކަނޑު އަޑި ދިރާސާކޮށް ޗާޓް ކުރެހުމަށް އިންޑިއާއާ އެކު ހަދާފައިވާ ހައިޑްރޯގްރަފީ އެއްބަސްވުން އުވާލަން މި ސަރުކާރުން އިންޑިއާ އަށް އޮތީ ނޯޓިސް ދީފަ އެވެ. މިދިޔަ ޑިސެމްބަރު މަހު ރައީސް އޮފީހުން ބުނި ގޮތުގައި އިންޑިއާ އަށް ދިން ނޯޓިސްގެ ދަށުން ހައިޑްރޯގްރަފީ އެއްބަސްވުން މި އަހަރުގެ ޖޫން މަހު އުވިގެންދާނެ އެވެ.

ރާއްޖޭގެ ކަނޑުތަކުގެ ސިފަތަކާއި ކަނޑުގެ ދިރުންތައް ދެނެގަންނަން ރާއްޖެ އާއި އިންޑިއާއާ ދެމެދު ހައިޑްރޯގްރަފީ އެއްބަސްވުމެއް ގާއިމްކުރީ 8 ޖޫން 2019 ގަ އެވެ.