އިންޑިއާގެ އެހީގައި ރާއްޖޭގައި އިތުރު ރާޑަރުތަކެއް ބަހައްޓަން ރައީސް ޑރ. މުހައްމަދު މުއިއްޒުގެ ސަރުކާރުން އެއްބަސްވެއްޖެ އެވެ.

ރައީސް އޮފީހުން ވަނީ މިކަން ހާމަކޮށްފަ އެވެ. މިކަމަށް އެއްބަސްވީ ރައީސް މުއިއްޒު މިހާރު އިންޑިއާއަށް ކުރައްވަމުން ގެންދަވާ ދަތުރުގެ ތެރެއިން އިއްޔެ ރާއްޖެ އާއި އިންޑިއާއިން ސޮއިކުރި އިކޮނޮމިކް އެންޑް މެރިޓައިމް ސެކުއިރިޓީ ޕާޓްނަޝިމް އެއްބަސްވުމުގަ އެވެ.

ރައީސް އޮފީހުން ނެރުނު ބަޔާނުގައިވާ ގޮތުން، އާ އެއްބަސްވުމުގެ ދަށުން ރާއްޖޭގެ ކަނޑުގެ ސަރަހައްދު ބެލެހެއްޓުމުގައި އެމްއެންޑީއެފް އަށް ރާޑަރު ސިސްޓަމުތަކާއި އެކަމަށް ބޭނުންވާ އިތުރު އާލާތްތައް އިންޑިއާއިން ފޯރުކޮށްދޭނެ އެވެ.

މިދިޔަ ފަސް އަހަރުގެ ތެރޭގައި އިންޑިއާގެ އެހީގައި ރާއްޖޭގެ 10 ސަރަހައްދެއްގައި ކޯސްޓަލް ރާޑަރު ސިސްޓަމުތަކެއް ރާއްޖޭގައި ހަރުކޮށްފައިވެ އެވެ. އޭރުގެ ސަރުކާރުން ބުނީ އެ ރާޑަރުތައް ބަލަހައްޓަނީ ދިވެހި ސިފައިން ކަމަށެވެ.

އެ ރާޑަރުތައް ހަރުކުރުމުން ރައީސް މުއިއްޒާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި މި ސަރުކާރުގެ އިސްވެރިން އޭރު ވަނީ ދިވެހީންގެ މިނިވަންކަން އިންޑިއާއަށް ވިއްކާލަނީ ކަމަށް ބުނެ އެކި ވާހަކަތައް ދައްކާފަ އެވެ.

އިންޑިއާއާއެކު ކުރީ ސަރުކާރުން ހަދާފައިވާ އެއްބަސްވުންތައް ބާތިލްކުރާނެ ކަމަށް ވެސް ރައީސް މުއިއްޒު ރިޔާސީ ކެމްޕޭން ތެރޭގައި ވިދާޅުވެފައިވެ އެވެ.