ހަރަދު ކުޑަކުރުމުގެ އަވަސް ފިޔަވަޅުތަކެއް ރާއްޖެއިން އަޅަންޖެހޭ ކަމަށް ވޯލްޑް ބޭންކުން މިއަދު ބުނެފި އެވެ.

ވަކިވަކި ގައުމުތަކަށް ވޯލްޑް ބޭންކުން އަހަރަކު ދެ ފަހަރު އެކުލަވައިލާ އިގުތިސާދީ އަޕްޑޭޓް "މޯލްޑިވްސް ޑިވެލޮޕްމެންޓް އަޕްޑޭޓް: ސީކިން ސްޓެބިލިޓީ އިން ޓާބިއުލެންޓް ޓާމްސް" ބުނެފައިވަނީ ރާއްޖެއިން މާލީ އިސްލާހީ ފިޔަވަޅުތައް ތަންފީޒުކުރުން ލަސްވެފައިވާކަމަށެވެ.

ސަރުކާރުން މާލީ އިސްލާހީ ފިޔަވަޅުތަކެއް ހުށަހެޅި ނަމަވެސް އެ ކަންކަން ތަންފީޒުވާތަން ނުފެންނަ ކަމަށާއި ޚަރަދު ކުޑަކުރުމުގެ އަވަސް ފިޔަވަޅުތަކެއް ދިވެހިރާއްޖެއިން އަޅަންޖެހޭ ވޯލްޑް ބޭންކުން ބުނެފައިވެ އެވެ.

މެދުރާސްތާގައި އާމްދަނީ އިތުރުކުރަން އެކުލަވައިލި ޕްލޭނަށް ވޯލްޑް ބޭންކުން ވަނީ މަރުޙަބާ ކިޔައިފަ އެވެ. އަދި ޕަބްލިކް އިންވެސްޓްމަންޓާއި، ސަރުކާރުގެ ކުންފުނިތަކާއި، ސަބްސިޑީތައް ރިފޯމް ކުރުން އަވަސްކުރަންޖެހޭކަން އެ އިދާރާއިން ވަނީ ފާހަގަކޮށްފަ އެވެ.

މީގެ އިތުރުން ދައުލަތަށް ޓީޖީއެސްޓީގެ ގޮތުގައި ލިބުނު އާމްދަނީ އިތުރުވެ، ދައުލަތުގެ ޖުމްލަ އާމްދަނީ 9.5 ޕަސެންޓަށް އިތުރުވުމާ ގުޅިގެން އޯވަރޯލް ބަޖެޓު ޑެފިސިޓު 677 މިލިއަން ރުފިޔާއާށް ކުޑަކުރެވިފައިވާ ކަން އެ ރިޕޯޓްގައި ވަނީ ފާހަގަކޮށްފަ އެވެ. ނަމަވެސް، ދައުލަތުގެ ހިންގުމުގެ ހަރަދު 6.5 ޕަސެންޓަށް އިތުރުވެފައިވާކަން ފާހަގަކޮށްފައިވެ އެވެ.

ދައުލަތުން ޕްރައިވެޓް ސެކްޓާގެ ކޮންޓްރެކްޓަރުންނާއި އެހެން ދާއިރާތަކުގެ ފަރާތްތަކަށް ދައްކަން ޖެހޭ ބިލްތަކަށް ފައިސާ ލިބުމުގައި ވަރަށް ބޮޑަށް ލަސްވެފައިވާ ކަން ފާހަގަކުރެވޭ ކަމަށް ރިޕޯޓުގައިވެ އެވެ. ފައިސާ ދިނުން ލަސްވުމުގެ ސަބަބުން މައިގަނޑު ސިނާއަތްތައް ކަމަށްވާ ސިއްހީ ދާއިރާއާއި ކޮންސްޓްރަކްޝަން ފަދަ ދާއިރާތަކަށް ނޭދެވޭ އަސަރުކުރާކަން ފާހަގަކޮށްފައިވެ އެވެ.

ރާއްޖޭގެ ބޭރު ދަރަނި އިންތިހާއަށް ބޮޑުވެފައިވާއިރު، ދަރަނި މިހާރު ހުރީ ޖީޑީޕީގެ ނިސްބަތުން 116.5 އިންސައްތައިގައި ކަމަށާއި ބޭރުގެ ދަރަނި އަދާކުރަން އުފެއްދި ސޮވެރިން ޑިވޮލޮޕްމަންޓް ފަންޑުގައި ވެސް ހުރީ 65 މިލިއަން ޑޮލަރު ކަމަށެވެ. އެއީ، އެކަށޭނަ އަދަދެއް ނޫން ކަމަށް އެ ބޭކުން ބުނެފައިވެ އެވެ.

ރާއްޖޭގެ މާލީ ހާލަތު ގޯސްވެ، ބައިނަލްއަގުވާމީ އެންމެ ބޮޑު ދެ ރޭޓިން އެޖެންސީން ވަނީ ރާއްޖޭގެ ކްރެޑިޓް ރޭޓިން ދަށްކޮށްފައެވެ. އެ ގޮތުން، މޫޑީސްއިން ވަނީ ރާއްޖޭގެ ރޭޓިން 'ސީއޭއޭ2' އަށް ދަށްކޮށްފަ އެވެ. އޭގެ ކުރިން މިދިޔަ އޮގަސްޓު މަހުގެ 29 ގައި ފިޗުން ވެސް ވަނީ ރާއްޖޭގެ ރޭޓިން 'ސީސީ'އަށް ދަށްކޮށްފަ އެވެ.