އަވަށްޓެރި ސްރީ ލަންކާގެ ފަތުރުވެރިކަމުގެ އަވަށެއް ކަމަށްވާ އަރޫގަމް ބޭގެ އެކި ސަރަހައްދުތަކަށް ޓެރަރިޒަމް ހަމަލާތަކެއް ދީފާނެ ކަމުގެ އިންޓެލިޖެންސް މައުލޫމާތު ލިބިފައިވާ ކަމަށް ލަންކާގައި ހުންނަ އެމެރިކާގެ އެމްބަސީން ބުނެފި އެވެ.

އެމްބަސީން މިކަމާއި ގުޅިގެން ވަނީ އެމެރިކާގެ ރައްޔިތުން ސަމާލުވުމަށް ޓްރެވަލް އެޑަވައިޒަރީއެއް ނެރެފަ އެވެ.

މި އިންޒާރާއެކު ރައްކާތެރިކަމުގެ ފިޔަވަޅެއްގެ ގޮތުން ވަކި ގޮތެއް އަންގަންދެން އަރޫގަމް ބޭއަށް އެމްބަސީގެ މީހުން ދަތުރުކުން އެމްބަސީން ވަނީ މަނާކޮށްފަ އެވެ.

އެމްބަސީން ވަނީ އެމެރިކާގެ ރައްޔިތުން މިވަގުތު އެ ސަރަހައްދުން ދަތުރުނުކުރަން އިލްތިމާސްކޮށްފަ އެވެ. މިކަމާއި ގުޅިގެން ކުއްލި ހާލަތެއް ދިމާވެއްޖެނަމަ 119އަށް ގުޅައިގެން އެހީ ހޯދުމަށާއި ރިޕޯޓު ކުރުމަށް އެމްބަސީން ބުނެފައިވެ އެވެ.

އެމްބަސީން ނެރުނު އެޑްވައިޒަރީގައި ވަނީ އެ ސަރަހައްދުގެ ވަށައިގެންވާ މާހައުލަށް ސަމާލުވެ، ރައްކާތެރިކަން ނެތް ކަމަށް އިހުސާސް ކުރެވޭ ކޮންމެ ހާލަތެއްގައިވެސް ސަލާމަތްތެރިކަން ހޯދުމަށް އެދިފަ އެވެ.

ލަންކާގައި ވަނީ އީސްޓާ ސަންޑޭގެ އިހުތިފާލުތަކާ ދިމާކޮށް، 21 އެޕްރީލް 2019 ގައި ލަންކާގެ ވެރިރަށް ކޮޅުނބުގައި ހުންނަ ކްރިސްޓިއަނުންގެ ތިން ފައްޅިއަކަށާއި ތިން ޓޫރިސްޓު ހޮޓަލަކަށް ބޮމުގެ ހަމަލާތަކެއް ދީފަ އެވެ. އެ ހާދިސާގައި 269 މީހަކު މަރުވި އިރު އޭގެ ތެރޭގައި ބޭރު ގައުމުތަކުގެ 46 މީހަކު ހިމެނުނެވެ.