މިއުޒިކް ދާއިރާގެ މަޝްހޫރު ޗާޓެއް ކަމަށްވާ "ބިލްބޯޑް ހޮޓް 100" ޗާޓުން ކޭޕޮޕް ބޭންޑް ބްލެކްޕިންކްގެ މެމްބަރު ޖެނީ ޖާގަ ހޯދައިފި އެވެ.

އެންމެ ފަހުން ރިލީޒް ކުރެވުނު ޖެނީގެ ސޯލޯ ސިންގަލް "މަންޓްރާ" ލިސްޓު ކުރެވިފައިވަނީ އެ ޗާޓުގެ 98 ވަނަ އަށެވެ. މިއީ ސޯލޯ ސިންގަލްއަކުން ޖެނީ އެ ޗާޓަށް އެރި ފުރަތަމަ ފަހަރެވެ.

މީގެ ކުރިން ލިލީ ރޯޒް ޑެޕްއާއި ދަ ވީކެންޑްއާއެކު ޖެނީ ހަދާފައިވާ ކޮލެބޮރޭޝަން ލަވައެއް ވަނީ އެ ޗާޓުގެ 51 ވަނައިގައި ލިސްޓު ކުރެވިފަ އެވެ.

މި ކާމިޔާބީއާއެކު ޖެނީ ވެފައިވަނީ ބިލްބޯޑް ހޮޓް 100 އިން ޖާގަ ހޯދާފައިވާ ކޭޕޮޕް އަށް ނިސްބަތްވާ ތިންވަނަ ސޯލޯ އާޓިސްޓަށެވެ.

"މަންޓްރާ" ވަނީ ބިލްބޯޑް ހޮޓް 100ގެ އިތުރުން ވެސް އެމެރިކާގެ އެހެން ޗާޓުތަކެއް ކަމަށްވާ "ބިލްބޯޑް ގްލޯބަލް 200"އާއި "ބިލްބޯޑް އެކްސްކްލޫސިވް ޔޫއެސް"އަށް ވެސް އަރާފަ އެވެ.

މި ޗާޓުތަކުގައި ޖެނީގެ އިތުރުން ޖާގަ ހޯދި އެހެން ތަރިންގެ ތެރޭގައި ބީޓީއެސްގެ ޖިމިން، ބިލީ އެއިލިޝް، ސެބްރީނާ ކާޕެންޓާ، ލޭޑީ ގާގާ އަދި ބްރޫނޯ މާސް ހިމެނެ އެވެ.

"ބިލްބޯޑް ހޮޓް 100" ޗާޓަކީ އެމެރިކާގައި އެންމެ ނަން ހިނގާ ލަވަތައް ހިމަނައިގެން ކޮންމެ ހަފްތާއަކު އެއްފަހަރު ނެރޭ ޗާޓެކެވެ. އެ ޗާޓުގައި އިނގިރޭސި ލަވަތަކުގެ އިތުރުން ބޭރު ގައުމުތަކުގެ ލަވަތައް ވެސް ހިމެނެ އެވެ.