ލުބުނާނުގައި ހަރަކާތްތެރިވާ ހިޒްބުﷲ ޖަމާއަތުން އައްޑިހަ ރޮކެޓް ހަމަލާ އިޒްރޭލަށް ފޮނުވާލައިފި ކަމަށް އިޒްރޭލުން ބުނެފި އެވެ.

އިޒްރޭލުގެ އަސްކަރިއްޔާއިން ނެރުނު ބަޔާނެއްގައި ބުނީ ހިޒްބުﷲ އިން އިޒްރޭލަށް މިއަދު ޖީމެޓީ ގަޑިން 12:00 އާ ހަމައަށް 80 ރޮކެޓް ފޮނުވާލާފައިވާ ކަމަށެވެ. މި ހަމަލާތައް ފޮނުވާލާފައިވަނީ ލުބުނާނުން ކަމަށް އިޒްރޭލުން ބުނެ އެވެ.

އީރާނުގެ އަސްކަރީ މަރުކަޒުތަކަށް އިޒްރޭލުން ހަމަލާތަކެއް ދިންތާ މަދު ގަޑިއިރުތަކެއްގެ ތެރޭގައި ހިޒްބުﷲ އިން މިވަނީ އިޒްރޭލަށް ހަމަލާދޭން ފަށާފަ އެވެ. ހިޒްބުﷲ ގެ ހަމަލާތައް ވެސް އަމާޒުކޮށްފައިވަނީ އިޒްރޭލުގެ އަސްކަރީ ބޭސްތަކަށެވެ.

ރޭ މެންދަމުގެ ވަގުތެއްގައި އިޒްރޭލުން އީރާނުގެ އަސްކަރީ މަރުކަޒުތަކަށް ދިން ހަމަލާތަކުގައި ދެ މީހަކު މަރުވެފައިވާކަމަށް އެ ގައުމުން ވަނީ ބުނެފަ އެވެ.

ހިޒްބުﷲ އިން ވަނީ ފާއިތުވި ހަފްތާ ތެރޭގައި ލުބުނާނަށް ވަދެގަނެގެން އުޅޭ އިޒްރޭލު ސިފައިންނަށް ގިނަ ހަމަލާތަކެއްދީ ފަހަތަށް ޖައްސާފަ އެވެ. ބަދަލުކުރި ހަމަލާތަކުގައި އިޒްރޭލު 10 ސިފައިން ވަނީ މަރާލާފަ އެވެ.

އިޒްރޭލުން ގެންދަނީ ލުބުނާނާއި ޣައްޒާއަށް ދެމުންދާ ހަމަލާތައް ހުއްޓުމެއްނެތި ދެމުންނެވެ. އެގޮތުން ހުކުރު ދުވަހު އެކަނިވެސް ލުބުނާނުން 41 މީހުން ޝަހީދުކޮށްލާފައިވާއިރު، ހަމަލާތަކުގައި 133 މީހަކު ޒަހަމްވެފައިވެ އެވެ.