ރާއްޖެއަށް އެތެރެކުރާ ދުންފަތުގެ ބާވަތްތައް ބޮންޑު ނުކުރެވޭ ގޮތަށް ކަސްޓަމްސްގެ ގަވާއިދު އިސްލާހުކޮށްފި އެވެ.

މިހާރު އޮންނަ ގޮތުން ރާއްޖެއަށް އެތެރެ ކުރުމާއި އަދި ރާއްޖެއިން ބޭރުކުރުން ހުއްދަ ކޮންމެ އެއްޗެއް ބެހެއްޓުމަށް ބޮންޑެޑް ވެއާހައުސް އެއް ރަޖިސްޓްރީ ކުރެވެ އެވެ.

ނަމަވެސް ކަސްޓަމްސްގެ ގަވާއިދަށް ގެނައި ބަދަލާއެކު ސިނގިރޭޓާއި ބިޑި ފަދަ ދުންފަތުގެ ބާވަތްތަކާއި، އީ-ސިނގިރޭޓާއި ވޭޕް އަދި އޭރޯސޮލް ބޭރުކޮށްދޭ ޓޮބޭކޯ ސްޓިކް މި ބައިގައި ނުހިމެނޭނެ އެވެ.

މީގެ ކުރިން، ދުންފަތުގެ ބާވަތްތައް އެތެރެކުރާ ފަރާތްތަކުން ޑިޔުޓީ ދައްކަމުންދަނީ، ބޮންޑެޑް ވެއާހައުސް އިން މުދާ ނެރޭ މިންވަރަކަށެވެ. މި އިސްލާހާ އެކު، މި ބާވަތްތައް އެތެރެކޮށް، ކަނޑައެޅިފައިވާ މުއްދަތުގައި މުދާ ކްލިއާ ކުރާ އިރު، މުޅި ޝިޕްމަންޓަށް ޑިޔުޓީ ދެއްކުން ލާޒިމުވާނެ އެވެ.

މީގެ އިތުރުން ބަނގުރަލާއ، އޫރުމަހާއި، އޫރުމަސް އެކުލެވޭ ތަކެއްޗާއި، ދުންފަތުގެ ބާވަތްތައް ޝިޕް ސްޓޯސްގެ ގޮތުގައި މުދާ ދޫކުރެވޭ ގޮތަށް އޮތް މާއްދާ ވެސް ކަސްޓަމްސް އިން ވަނީ އިސްލާހުކޮށްފަ އެވެ.

ކަސްޓަމްސްގެ ގަވާއިދު އިސްލާހު ކުރުމުގެ ކުރިން، ކަސްޓަމްސްއިން ހުއްދަކުރާ މިންވަރަކަށް، ރަޖިސްޓަރީ ކޮށްފައިވާ ބޮންޑެޑް ވެއާހައުސްއަކުން ޝިޕް ސްޓޯސްގެ ގޮތުގައި، އިމްޕޯޓް ޑިއުޓީއިން އިސްތިސްނާވާ ގޮތެއްގެ މަތީން މި ބާވަތްތައް ދޫކުރެވެ އެވެ.

ނަމަވެސް އިސްލާހާއެކު އެ މާއްދާ އިން މިހާރު އެ ބައި އުނިކޮށް، ބަނގުރަލާއި، އޫރުމަހާއި އޫރުމަސް އެކުލެވޭ ތަކެއްޗާއި ދުންފަތުގެ ބާވަތްތައް ޝިޕް ސްޓޯސްގެ ގޮތުގައި މުދާ ދޫކުރަން ހުއްދަ ނުދެވޭ ގޮތަށް ވަނީ ބަދަލުކޮށްފަ އެވެ.

މީގެއިތުރުން، ބޮންޑެޑް ވެއާހައުސް ހެދުމާބެހޭ މާއްދާ ވެސް ކަސްޓަމްސް އިން ވަނީ އިސްލާހުކޮށްފަ އެވެ.

މިގޮތުން، ބޮންޑެޑް ވެއާހައުސްގެ ގޮތުގައި ކަސްޓަމްސްގެ ކޮންޓްރޯލް އޮންނަ ސަރަހައްދުތަކުގެ އިތުރުން، ކަސްޓަމްސްއިން ކަނޑައަޅައި އާންމުކުރާ އައިޓަމްތަކެއް ބެހެއްޓުމަށް ހާއްސަކުރާ ބޮންޑެޑް ވެއާހައުސް ކަސްޓަމްސްގެ އޮފީސްތައް ހުންނަ ސަރަހައްދުތަކުގައި ހެދިދާނެ ކަމަށް އިސްލާހުގައި ބުނެފައިވެ އެވެ.

އޮޅުވާލައިގެން މުދާ އެތެރެކުރާނަމަ، ކަސްޓަމްސް އިން ކުރެވޭ ޖޫރިމަނާތަކަށް ވެސް އާ އިސްލާހުގައި ވަނީ ބަދަލުތަކެއް ގެނެސްފަ އެވެ.

އޭގެތެރޭގައި ހިމެނެނީ އިންވާޑް އަދި އައުޓްވާޑް ކާގޯ މެނިފެސްޓް ނުހިމަނައި ރާއްޖެއަށް ސިއްރުން މުދާ އެތެރެކުރުން ނުވަތަ ކުރަން އުޅުން ނުވަތަ ކުރުމުގައި ބައިވެރިވާނަމަ، ކޮންމެ ފަހަރަކު 200،000ރ. ގެ ޖޫރިމަނާއެއް ގަވާއިދުގައި ވަނީ ހިމަނައިފަ އެވެ.

އަދި މުދާ އުފުލާ އުޅަނދު ބަނދަރުކުރާ ތަނާއި، ރާއްޖެއަށް ވަންނަން ބޭނުންކުރާ ސަރަހައްދު ކަމަށް ކަސްޓަމްސްއަށް ހުށަހަޅާ ލިޔުންތަކާ ހިލާފަށް ދަތުރުކޮށް ނުވަތަ ބަނދަރުކޮށްފިނަމަ 100،00ރ. އިން ޖޫރިމަނާ ކުރެވޭ ގޮތަށް ގަވާއިދު ވަނީ އިސްލާހުކޮށްފަ އެވެ.

އަދި ރާއްޖެއަށް އަންނަ ކަނޑު އުޅަނދުފަހަރުގައި ހަރުކޮށްފައި ހުންނަ އޮޓަމެޓިކް އައިޑެންޓިފިކޭޝަން ސިސްޓަމް ނިއްވާލައިފިނަމަ، 200،000ރ. ގެ ޖޫރިމަނާ އެއް ދައްކަންޖެހޭގޮތަށް ވަނީ ބަދަލުކޮށްފަ އެވެ.

ކަސްޓަމްސްގެ ގަވާއިދަށް މި އިސްލާހުތައް ގެނެސްފައިމިވަނީ، ވޭޕް މަނާ ކުރުމާ ހަމައަށް ވޭޕުން ނަގާ ޑިއުޓީއާއި ދުންފަތުގެ ބާވަތްތަކުން ނަގާ ޑިއުޓީ މިއަދުން ފެށިގެން ބޮޑުކުރަން ނިންމުމާއެކު އެވެ.