ގިނަ ބަޔަކު އިންތިޒާރު ކުރަމުން އަންނަ ކޮރެއާގެ ސީރީޒް "ސްކުއިޑް ގޭމް"ގެ ދެވަނަ ސީޒަން އޭގެ ފުރަތަމަ ސީޒަނަށްވުރެ ވެސް މާ ޝައުގުވެރިވާނެ ކަމަށް ޝޯގެ ޕްރޮޑިއުސަރުން ބުނެފި އެވެ.

ސްކުއިޑް ގޭމް 2ގެ ޕްރޮމޯޝަން އިވެންޓެއްގައި ވާހަކަ ދައްކަމުން ޝޯގެ ޕްރޮޑިއުސަރެއް ކަމަށްވާ ވޭންގް ޑޮންގް ވިދާޅުވީ މި ސީޒަނުގައި ނޭވާ ހިފަހައްޓާލަންޖެހޭ ގިނަ ކަންކަން ފެނިގެންދާނެ ކަމަށެވެ.

އެގޮތުން މިފަހަރުގެ ސީޒަންގައި ކުރީގެ ސީޒަނަށްވުރެ ގިނަ ތަރިން ހިމެނޭނެ ކަމަށާއި ބައިވެރިންނަށް ކުރަންޖެހޭ ކަންތައްތައް (ޓާސްކްތައް) ވެސް ވަރަށް ތަފާތުވާނެ ކަމަށް އޭނާ ބުންޏެވެ.

މީގެ އިތުރުން ވެސް އެ ސީރީޒްގެ ތިންވަނަ ސީޒަންއެއްގެ މަސައްކަތް ވެސް ފަށާނެ ކަމަށާއި އިނގިރޭސި ބަހުގެ ފިލްމެއް ފެނިދާނެ ކަމަށް ވެސް އޭނާ އިޝާރާތް ކޮށްފައިވެ އެވެ.

2021 ވަނަ އަހަރު ރިލީޒްކުރި ސްކުއިޑް ގޭމްގެ ފުރަތަމަ ސީޒަން ވެގެން ގޮސްފައިވަނީ ނެޓްފްލިކްސްގައި އެ ދުވަސްވަރު އެންމެ ގިނަ މީހުން ބެލި ސީރީޒް އަށެވެ.

"ސްކުއިޑް ގޭމް"އަށް ލިބުނު ހޫނު ތަރުހީބާއެކު އެ ސީރީޒްގެ ޕްރޮޑިއުސަރުން ވަނީ ދެވަނަ ސީޒަނަކަށް އެ ސީރީޒް އާކޮށްފަ އެވެ.