މިނިވަން މުއައްސަަސާތަކެއް ކަމަށްވާ އިލެކްޝަންސް ކޮމިޝަން (އީސީ) އަދި އެންޓި ކޮރަޕްޝަން ކޮމިޝަން (އޭސީސީ)ގެ ރައީސުންނަކީ ރައީސުލްޖުމްހޫރިއްޔާ އައްޔަންކުރައްވާ ފަރާތްތަކަކަށް ހެދުމަށް އެ ދެ ކޮމިޝަންގެ ގާނޫނަށް ސަރުކާރުން ހުށަހެޅި އިސްލާހީ ބިލުތައް މަޖިލީހުން ބަލައިގަނެ މިނިވަން މުއައްސަސާތަކުގެ ކޮމެޓީއަށް މިއަދު ފޮނުވައިފި އެވެ.

މިއަދުގެ ޖަލްސާގައި މި ބިލްތައް މަޖިލީހުން ބަލައިގަނެފައި ވަނީ 60 މެންބަރުންގެ ވޯޓުންނެވެ. އޭސީސީގެ ބިލާ ދެކޮޅަށް ވޯޓު ދެއްވީ 5 މެންބަރުންނެވެ. އީސީގެ ބިލާ ދެކޮޅަށް ވޯޓު ދެއްވީ 6 މެންބަރުންނެވެ.

މިބިލުތަކާ ގުޅިގެން މަޖިލީހުގެ ތަޅުމުގައި ވަނީ ވަރަށް ބޮޑަށް ބަހުސްކޮށްފަ އެވެ. މި ބިލު ހުށަހެޅި ސަރުކާރަށް ނިސްބަތްވާ މެންބަރުން ވަނީ މި ބިލަކީ ހުއްޓިފައިވާ މިނިވަން މުއައްސަަސާތައް ހިނގުމަށް މަގުފަހިވެގެންދާނެ ބިލެއް ކަމަށް ބުނެފަ އެވެ. އަދި ސަރުކާރުގެ މެންބަރުން ދެކޭގޮތުގައި އޭސީސީ އިސްލާހުކުރެވޭނީ ރައީސް ބޭނުންފުޅުވާ މީހަކު އެ މުއައްސަސާގެ ރައީސަކަށް ނުވަތަ ނައިބު ރައީސަކަށް ހުރެގެންނެވެ.

މި ބިލާ ދެކޮޅަށް ވާހަކަ ދައްކާފައިވަނީ އިދިކޮޅު އެމްޑީޕީ މެންބަރުންނެވެ. އެމްޑީޕީ މެންބަރުން ދެކޭ ގޮތުގައި މި އިސްލާހަކީ މިނިވަން މުއައްސަސާތަކުގެ ތެރެއަށް ސަރުކާރުން އަތް ބޭނުމަށް ކުރަމުންދާ މަސައްކަތުގެ ފެށުމެކެވެ.

މި ބިލްތަކުގެ އިސްލާހުގައިވާ ގޮތުން އެސީސީ އަދި އީސީގެ ރައީސްކަމަށް އައްޔަނުކުރަން ބޭނުންވާ މީހެއްގެ ނަން (އެ ކޮމިޝަންގަ ތިބި މެންބަރުންގެ ތެރެއިން މެންބަރެއްގެ ނަމެއް) ރައީސުލްޖުމްހޫރިއްޔާ މަޖިލީކަށް ފޮނުވުމުން މަޖިލީހުގެ ވޯޓެއް ނަގަައި ނަން ފާސްކުރަން ޖެހެ އެވެ.

މިހާރުގެ ގާނޫނު އޮންނަ ގޮތުން އެސީސީ އަދި އީސީގެ ރައީސް އަދި ނައިބު ރައީސް އައްޔަން ކުރަނީ އެ މެންބަރުންގެ ތެރޭގައި ނަގާ އަމިއްލަ ވޯޓަކުންނެވެ.