ރައީސް މުހައްމަދު މުއިއްޒުގެ ސަރުކާރަށް މިއަދު އެއް އަހަރުވީ އެވެ. ގްރޭޓާ މާލެ ސަރަހައްދު އަދި ރާއްޖޭގެ އާބާދީ ބޮޑު އެއްވެސް އަތޮޅެއްގައި ފަށައިގެން ކުރިޔަށްދާ ބޮޑު މަޝްރޫއެއް ލޮލަށް ފެންނާކަށް ނެތެވެ. ކިރިޔާ ވެސް ދެއްކެން އޮތީ ރަސްމާލޭގެ ނަމުގައި ހިއްކަން ފެށި ފުށިދިއްގަރުފަޅުގެ ވާހަކަ އެވެ. އެތަނުގައި ފިނޮޅެއް ވަރުގެ ތަންކޮޅެއް ހިއްކާފައި އެބަ އޮތެވެ. އެނޫން އެއްވެސް ކަމެއް މި މާލެ ސަރަހައްދުން ލޮލަށް ފެންނާކަށް ނެތެވެ.

އެކަމަކު މިދިޔަ އެއް އަހަރުގެ ތެރޭގައި ރައީސް މުއިއްޒު ވަނީ ބިޔަ މަޝްރޫއުތަކެއްގެ ރިބަން ކަނޑުއްވައިފަ އެވެ. އެ ލިސްޓުގެ އެންމެ ކުރީގައި އޮތީ ރައީސް އަބްދުﷲ ޔާމީންގެ ވެރިކަމުގައި ވެލާނާ އިންޓަނޭޝަނަލް އެއާޕޯޓުގައި ހެދި އާ ކާގޯ ޓާމިނަލް ރަސްމީ ގޮތުން ހުޅުވުމެވެ. ރައީސް ޔާމީންގެ ސަރުކާރުގައި އެ އެއާޕޯޓުގައި ހިންގި އެންމެ ބޮޑު އެއް މަޝްރޫއު މިއަހަރުގެ ޖެނުއަރީ 15 ވަނަ ދުވަހު އިފްތިތާހުކުރި އިރު އެ މަނިކުފާނުގެ ނަމެއް ވެސް ނެތެވެ. އެކަން ވެސް ނިމިގެން ދިޔައީ ރައީސް މުއިއްޒުގެ މޮޅު ސިޔާސަތުގެ ދަށުން ނިމިގެންދިޔަ މަޝްރޫއެއްގެ ގޮތުގަ އެވެ.

ވެލާނާ އިންޓާނޭޝަނަލް އެއާޕޯޓް ތަރައްގީކުރުމުގެ މަޝްރޫއުގެ ތެރޭގައި ހިމެނިގެން ތަރައްގީކޮށްފައިވާ މި އާ ކާގޯ ޓާމިނަލަކީ ކުރީގެ ޓާމިނަލަށްވުރެ ކާގޯ ހޭންޑްލިންގެ މަސައްކަތް ގާތްގަނޑަކަށް ތިންގުނަ އިތުރަށް ކުރެވޭ ވަރުގެ ބޮޑު ޓާމިނަލެކެވެ. އެގޮތުން ކުރީގެ ބާ ޓާމިނަލުން އަހަރަކު 50،000 ޓަނުގެ ކާގޯގެ ޚިދުމަތްދެވޭ އިރު މި އާ ކާގޯ ޓާމިނަލާއެކު ޖުމްލަ 120،000 ޓަނުގެ ކާގޯގެ ޚިދުމަތް އަހަރަކު ދެވޭނެ ގާބިލުކަން ހުރެ އެވެ.

ރައީސް މުއިއްޒު ވެސް އެ އެއާޕޯޓު ތަރައްގީކުރުމުގެ ބޮޑު މަޝްރޫއެއް އިއުލާންކުރައްވައިފަ އެވެ. އެއީ އެ އެއާޕޯޓުން އަހަރަކު 25 މިލިއަން ޓޫރިސްޓުން ޚިދުމަތް ދެވޭ ފެންވަރަށް ތަރައްގީކުރުމުގެ މެގަ ޕްރޮޖެކްޓެއްގެ ވާހަކަ އެވެ. މީގެ އިތުރުން ވީއައިއޭގައި މިހާރު ހިންގަމުން އަންނަ ސީޕްލޭން ޓާމިނަލް ޝެރެޓަން މޯލްޑިވްސް ފުލް މޫން ރިސޯޓަށް ބަދަލުކުރުމުގެ މަޝްރޫއެއް ވެސް އިއުލާންކުރި އެވެ.

ޖެނުއަރީ 4، 2024 ވަނަ ދުވަހުގެ ރޭ ދަރުބާރުގޭގައި ބޭއްވި ރަސްމިއްޔާތުގައި ވިދާޅުވީ މިހާރު އެއާޕޯޓު ތަރައްގީ ކުރުމުގެ މަޝްރޫއު އާ އެކު އެކީގައި އާ ތަސައްވަރުގެ މަސައްކަތް ވެސް ފެށިގެންދާނެ ކަމަށެވެ.

އޭގެ ތެރޭގައި، އެ މަޝްރޫއުއަށް ބޭނުންވާ ބިން ހިއްކުމާއި ސީ ޕްލޭން ޓާމިނަލް ބަދަލު ކުރުމާއި ކ. ފޮނަދޫގައި ހުރި ފިއުލް ސްޓޯރޭޖް ބަދަލުކުރުން ހިމެނޭނެ ކަމަށް އެ މަނިކުފާނު ވިދާޅުވި އެވެ. އަދި ސްޕެޝަލް އިކޮނޮމިކް ޒޯން (އެސްއީޒެޑް)ގެ ދަށުން ފޮނަދޫ އިންޓަނޭޝަނަލް ފައިނޭންޝަލް ސެންޓަރަކަށް ބަދަލުކޮށް، އެ ރަށާއި މާލެ ބްރިޖަކުން ގުޅާލުން ވެސް ހިމެނޭ ކަމަށް ވެސް ރައީސް ވިދާޅުވި އެވެ. ނަމަވެސް ވެރިކަމަށް އެއް އަހަރު ފުރުނުއިރު އެ އެއާޕޯޓުގެ ތަރައްގީއަށް އެންމެ ގާބުރިއެއް ވެސް މިހާތަނަށް ބޭއްވިފައެއް ނުވެ އެވެ. ނުވިތާކަށް ލަސްވެގެން މިއަހަރުގެ ޓޫރިސްޓު ސީޒަނާ ދިމާކޮށް ޑިސެމްބަރު މަހު ހުޅުވާނެ ކަމަށް ބުނި އާ ޓާމިނަލްގެ މަސައްކަތެއް ވެސް ނުނިމުނެވެ. އެކަމަކު ރައީސް ޔާމީންގެ ސަރުކާރުގައި ތަރައްގީކުރަން ފެށި އާ ފިއުލް ފާމް ވެސް ރަސްމީކޮށް ހުޅުވައިދެއްވުމުގެ ގޮތުން ރައީސް މުއިއްޒު ވަނީ މިމަހުގެ ހަތްވަނަ ދުވަހު އެތަނުގެ ރިބަން ވެސް ކަނޑުއްވައިދެއްވައިފަ އެވެ.

ރައީސް މުއިއްޒުގެ ވެރިކަމަށް އެއް އަހަރު މިއަދު ފުރުނުއިރު، އެންމެ ބޮޑު މަޝްރޫއެއްގެ ގޮތުގައި އިއުލާންކުރީ ރަސްމާލެ ހިއްކުމުގެ މަޝްރޫއެވެ. ޑިސެމްބަރު 18، 2023 ވަނަ ދުވަހު އެ މަޝްރޫއު ފައްޓަވައިދެއްވަމުން ރައީސް މުއިއްޒު ވިދާޅުވީ މި މަޝްރޫއުގެ ދަށުން 1،153 ހެކްޓަރުގެ ބިން ގާތްގަނޑަކަށް އަށް މަސް ދުވަހުގެ ތެރޭގައި ހިއްކާ ނިންމާނެ ކަމަށެވެ. އެއީ ހުޅުމާލޭގެ ދެ ފިޔަވަހި އެއްކޮށްލީމަ ވާ ވަރަށް ގާތްގަނޑަކަށް ތިން ގުނަ ބޮޑު ސަރަހައްދެއް ކަމަށް ވެސް އެމަނިކުފާނު ވިދާޅުވި އެވެ. އެކަމަކު އެ މަޝްރޫއު ފެށިތާ އެއް އަހަރު ފުރޭއިރު އެތަނުން އަދި ހިއްކުނީ ދިހަ ވަރަކަށް ހެކްޓަރުގެ ބިމެވެ.

އެ މަޝްރޫއު ފެށީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީ) ކިޔާ ބަޔަކާ ހަވާލުކޮށްގެންނެވެ. އެތަން ހިއްކުމުގެ މަސައްކަތް ފެށި ނެދަލެންޑްގެ ބޮސްކާލިސްއަށް ސީއެމްސީން ދޭން ޖެހޭ ފައިސާ ނުދެވިގެން އެންމެ ފަހުން އެ މަސައްކަތް ވަނީ ހުއްޓިފަ އެވެ.

މީގެ އިތުރުން ވެރިކަމަށް އެއް އަހަރު ފުރޭއިރު ރައީސް މުއިއްޒު ވަނީ މިދިޔަ ހަފުތާގައި ދަރުމަވަންތަ ހޮސްޕިޓަލް ވެސް ރަސްމީކޮށް ހުޅުވައިދެއްވައިފަ އެވެ. އެ އިމާރާތް ބޭނުންކުރަން ފެށިތާ ފަސް އަހަރެއްހާ ދުވަސް ފަހުން އެއްވެސް އުނި އިތުރެއް ނުގެނެސް އެތަން ވެސް ހުޅުވައިދެއްވައި، އެ މަޝްރޫއުގެ ހުރިހާ ތައުރީފެއްގެ ހައްގުވެރިއަކީ އެމަނިކުފާނު ކަމަށް ވަނީ ނިންމަވައިފަ އެވެ.

ރައީސް މުއިއްޒުގެ ވެރިކަމަށް މިއަދު އެއް އަހަރު ފުރުނުއިރު، އެމަނިކުފާނުގެ އެންމެ ބޮޑު އެއް ވައުދުގެ ގޮތުގައި ހިމެނޭ ބޯހިޔާވަހިކަމުގެ މަޝްރޫއެއްގެ ހިލަމެއް ވެސް ނެތެވެ. ނުވިތާކަށް ކުރީގެ ސަރުކާރުން ދޭން ނިންމައި އިއުލާންކުރި 4،000 ފްލެޓް އޭގެ ހައްގުވެރިންނަށް ދެވޭވަރު ވެސް ނުވި އެވެ. މީގެ އިތުރުން އައްޑޫގެ ބްރިޖާއި ތިނަދޫގައި ހަދަން އިއުލާން ކުރި އިންޓަނޭޝަނަލް އެއާޕޯޓާއި ގއ. ވިލިނގިލީ އެއާޕޯޓާއި ލ. ގަމުގައި ހަދާ ޓްރާންޝިޕްމަންޓް ޕޯޓު އަދި އުތުރުގެ ބަންކަރިން މަޝްރޫއުގެ ވާހަކަދެއްކުމުގެ ބޭނުމެއް ނެތެވެ.

މިދިޔަ އެއް އަހަރު ދުވަހުގެ ތެރޭގައި މުޅިން ވެސް ފެނިގެން ދިޔައީ ރަސްމާލެ އާއި މާލެއާ ގުޅާލާ ކަނޑުއަޑީގެ ޓަނަލް ފަދަ ނުވާވަރުގެ ބިޔަ މަޝްރޫއުތަކުގެ ވާހަކަދެއްކުމާއި ރަސްމާލެ ހިއްކައި ނިންމުން ފަދަ ބޮޑެތި މަޝްރޫއުތަކުގެ ވާހަކައިން ފޮނި ކެނޑުމުގަ އެވެ. ދެން އޮތީ އެހެން މީހަކު ހާދަފައި ހުރި ހާލިއަށް ރައީސް މުއިއްޒު ބިސް އެޅުމެވެ. އެކަން ކިތަންމެހާ ވެސް ފުރިހަމައަށް ކޮށްފި އެވެ.