ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ މެމްބަރު އިބްރާހިމް ހުސައިން (އިއްބެ)ގެ ޑްރީމްސް ހޯލްޑިން ކުންފުނިން މުވައްޒަފުންގެ ޕެންޝަނަށް ޖަމާކުރަން ޖެހޭ ބައި ލައްކައަށް ވުރެ ގިނަ ރުފިޔާ ނުދައްކާތީ އެ ފައިސާ ދައްކަން ސިވިލް ކޯޓުން ހުކުމްކޮށްފި އެވެ.

ޑްރީމްސް ހޯލްޑިންގްއަކީ މެމްބަރު އިބްރާހިމް މެނޭޖިން ޑިރެކްޓަރުކަން ކުރައްވާ ކުންފުންޏެކެވެ. އެ ކުންފުނީގެ ހިއްސާދާރުންގެ ގޮތުގައި ތިއްބަވަނީ އޭނާގެ އާއިލާގެ ބޭފުޅުންނެވެ.

އެ ކުންފުންޏާ ދެކޮޅަށް ޕެންޝަން އޮފީހުން ދައުވާކުރީ 2019 ވަނަ އަހަރުން ފެށިގެން މިދިޔަ އޭޕްރީލް މަހުގެ ނިޔަލަށް ބައެއް މަސްތަކުގައި ޖަމާކުރަން ޖެހޭ ޕެންޝަންގެ ފައިސާ ނުދައްކާތީ އެވެ. އެ ދައުވާގައިވާ ގޮތުން މިހާތަނަށް 53,000ރ. ނުދައްކާ އެބަހުއްޓެވެ.

ސިވިލް ކޯޓުން އިއްޔެ ކުރި ހުކުމުގައިވަނީ އެ ފައިސާ ނުދައްކާ ހުރިކަން ސާބިތުވާ ކަމަށާއި އެހެންކަމުން ހަތަރު މަސް ތެރޭގައި އެ ފައިސާ ދައްކަން އަންގާ ކަމަށެވެ.

މީގެކުރިން ބިދޭސީންގެ ފީ ނުދައްކާ ކުންފުނިތަކުގެ ލިސްޓް ސަރުކާރުން އާންމު ކުރިއިރު, އެ ކުންފުނިން ހަތް ލައްކައަށް ވުރެ ގިނަ ރުފިޔާ ނުދައްކާ ހުރިކަން ހާމަވި އެވެ