ގއ. ކަނޑުހުޅުދޫގައި ރޭ ހިންގި މާރާމާރީއެއްގައި އަނިޔާވި ދެ މީހުންގެ ތެރެއިން އެކަކު ހާލު ސީރިއަސްވެ މާލެ ގެނައުމަށް ނިންމައިފި އެވެ.

ފުލުހުން ބުނީ ކަނޑުހުޅުދޫގައި ދެ މީހެއްގެ މެދުގައި މާރާމާރީއެއް ހިންގި މައްސަލައެއް ރިޕޯޓްކޮށްފައިވާ ކަމަށެވެ.

މާރާމާރީ ހިނގާފައިވަނީ 37 އަހަރުގެ ދިވެހި ފިރިހެނަކަށާއި 40 އަހަރުގެ ދިވެހި ފިރިހެނެއްގެ މެދުގައި އެވެ.

މިހާރު އެ ދެ މީހުންނަށް ގއ. ވިލިނގިލީ އަތޮޅު ހޮސްޕިޓަލުގައި ފަރުވާދެމުންދާކަމަށް ފުލުހުން ބުންޏެވެ.

ކަނޑުހުޅުދޫން "ހުރިހާ" އާ ވާހަކަދެއްކި މީހަކު ބުނީ މާރާމާރީގައި ދެމީހުނަށްވެސް ބޮޑެތި އަނިޔާތަކެއް ލިބިފައިވާކަމަށެވެ. އޭގެ ތެރެއިން އެކަކުގެ ގައިގައި ގިނަ ޒަހަމްތަކެއް ހުރި އިރު އަތް ވަރަށް ބޮޑަށް ކަފައިގެން ގޮސްފައިވާކަމަށް އެމީހާ ބުންޏެވެ. ހާލު ސީރިއަސް ވުމުން މާލެ ގެނައުމަށް ނިންމާފައިވަނީ އެމީހާ އެވެ.

ދެވަނަ މީހާގެ ބޮލުގެ ނާށިގަނޑު ފެންނަވަރަށް ކަފައިގެން ގޮސްފައިވާކަމަށް އެ ރަށުން ވާހަކަދެއްކި މީހާ ބުންޏެވެ. އޭނާއަށް ވެސް ދަނީ އަތޮޅު ހޮސްޕިޓަލުގައި ފަރުވާދެމުންނެވެ.