އިޒްރޭލުން ސީރިޔާގެ އެކި ސަރަހައްދުތަކުގައި ވަރުގަދަ ހަމަލާތަކެއް ދޭން ފަށައިފި އެވެ.

ސީރިޔާގެ މުހިންމު ތިން ވައިގެ ބަނދަރާއި އަދި އެހެނިހެން މުހިންމު އަސްކަރީ މަރުކަޒުތަކަށް ވަނީ ހަމަލާތައް އަމާޒުކޮށްފަ އެވެ. މީގެ ތެރޭގައި ވެރިރަށް ދިމިޝްގް ވެސް ހިމެނެ އެވެ.

އިޒްރޭލްގެ ސިފައިން ސީރިޔާގެ ވެރިރަށަށް ހަމަލާދޭން ފެށުމާއެކު، ދިމިޝްގުގައި އިތުރު ގޮވުންތަކެއްގެ އަޑު އިވިފައިވާ ކަމަށް ރިޕޯޓްތައް ބުނެ އެވެ. އިޒްރޭލުގެ މީޑިއާތަކުން ވަނީ މީ އިޒްރޭލުގެ އެއާ ފޯސްގެ ތާރީހުގައި އެންމެ ވަރުގަދަ ވައިގެ ހަމަލާތަކުގެ ތެރެއިން އެއް ހަމަލާކަމަށް ރިޕޯޓްކޮށްފަ އެވެ.

މި ހަމަލާގައި މަރުވި މީހުންނާއި ޒަހަމްވި މީހުންގެ ތަފްސީލު ސާފެއް ނުވެ އެވެ.

ވެރިކަމުން ދުރުކުރެވުނު ސީރިޔާގެ ރައީސް ބައްޝާރުލް އަސަދުގެ ބޮޑުވަޒީރު ވިދާޅުވެފައިވަނީ އިދިކޮޅު ފަރާތްތަކުގެ އަތްމައްޗަށް ބާރު ދޫކޮށްލުމަށް އެއްބަސްވެފައިވާ ކަމަށެވެ. މިހާރު ސީރިޔާގައި އޮތީ މުހައްމަދު އަލް- ބަޝީރު އިސްވެ ހުންނަވައި އުފެއްދި ސެލްވޭޝަން ސަރުކާރެކެވެ.

ބައްޝާރުގެ ވެރިކަން ބަދަލުކުރުމަށް ހަރަކާތްތެރިވި އިދިކޮޅު ހަނގުރާމަވެރިންގެ ޖަމާއަތް ކަމަށްވާ އެޗްޓީއެސް އިން ވަނީ ހަނގުރާމައިގެ ޖަރީމާތަކުގައި ބައިވެރިވެފައިވާ ކުރީގެ އިސް އަސްކަރީ ވެރިންނާ މެދު ފިޔަވަޅު އަޅާނެ ކަމަށް ބުނެފަ އެވެ. މިހާރު އެޗްޓީއެސް އިން ދަނީ ބައްޝާރުގެ ވެރިކަމުގައި ސެދްނާޔާ ޖަލުގައި ގެއްލިފައިވާ ރައްޔިތުން ހޯދުމުގެ މަސައްކަތް ކުރަމުންނެވެ.

ގަތަރު، އިރާގު އަދި ސައޫދީ އަރަބިއްޔާއިން ސީރިޔާގެ ގޯލަން އުސްބިމުގައި އިޒްރޭލުން ވެރިވެގަތުމަށް ކުރަމުންދާ މަސައްކަތް ވަނީ ކުށްވެރިކޮށްފައިވެ އެވެ. އދ. ގެ ސުލްހައަށް މަސައްކަތްކުރާ ފަރާތްތަކުން ބުނެފައި ވަނީ މިއީ 1974 ގައި ވެފައިވާ ހަނގުރާމަ ހުއްޓުމުގެ އެއްބަސްވުމާ ހިލާފު ކަމެއް ކަމަށެވެ.