އައްޑޫ ހިތަދޫ މޫދަށް ކްލޮރިން އެޅުމުން ދިރުންތައް މަރުވެގެން ލައްގަނީ

އައްޑޫސިޓީ ހިތަދޫ ކިނބިވައު ސަރަހައްދުން ފުއްޓަރު ފަރާތަށް ގިނަ އަދަދަކަށް ކްލޮރިން އެޅުމާއި ގުޅިގެން އެ ސަރަހައްދުގެ މޫދުގެ ދިރުންތައް މަރުވެ ލައްގަން ފަށައިފި އެވެ.

އައްޑޫސިޓީ ކައުންސިލުން ވަނީ ކިނބިވައު ސަރަހައްދަށް ގިނަ އަދަދެއްގެ ކްލޮރިން އަޅާފައިވާކަމަށް ރިޕޯޓް ލިބިފައިވާކަމަށް ބުނެފަ އެވެ. ނަމަވެސް އެކަން ކުރިބަޔަކު ސާފުނުވާކަމަށް އެ ކައުންސިލުން ބުނެ އެވެ.

އެ ސަރަހައްދުގައި މޫދު ކައިރީގައި ކްލޮރިން ހުސްކޮށްފައި ހުރި މުއްދަތު ހަމަވެފައިވާ 25 ކިލޯގެ 15 ވަރަކަށް ފާޓާ ހުއްޓެވެ.

އައްޑޫ ނޭޗާ ޕާކުންވެސް ވަނީ މިކަމާއި ގުޅިގެން ސޯޝަލްމީޑިއާގައި މައުލޫމާތު ހިއްސާކޮށްފަ އެވެ. ކްލޮރިން އެޅުމުގެ ސަބަބުން ގިނަ އަދަދެއްގެ މަހާއި ކަނޑުގެ ދިރުންތައް މަރުވެ ލައްގަމުން ދާކަމަށް އެ ޕާކުން ބުނެ އެވެ. އަދި ފަރުމަތިވެސް ކްލޮރިން އެޅުމުގެ ސަބަބުން ވަނީ ހުދުވެފަ އެވެ.

މަރުވެގެން ލައްގާފައި ހުރި އެއްޗެހީގެ ތެރޭގައި ބޯވަ އާއި ބޯވަދިލަމަހާއި ޑިނގާ އާއި ކަކުންޏާއި ވެނާއި ތޮޅިޔާއި ކޮއްޔާއި އެހެން ބާވަތުގެ މަސްތައް ހިމެނެ އެވެ.

އައްޑޫ ސިޓީ ކައުންސިލުން ބުނީ މިއީ ތިމާވެއްޓަށް އޭގެ ނޭދެވޭ އަސަރުކޮށް މަސްތައް މަރުވެ އަދި އެސަރަހައްދުގެ ކަނޑުގެ ދިރުމަށް ނުހަނު ބޮޑަށް ގެއްލުން ލިބިދާނެ ކަމެއް ކަމަށެވެ.

"މިފަދަ ޢަމަލުތަކަކީ ކައުންސިލުން ނުހަނު ކަންބޮޑުވާ ކަމެއް. މިފަދަ ޢަމަލުތައް ނުކުރުމަށާއި މިފަދަ އަމަލުތަކާއި ދުރުހެލިވުމަށް ނަސޭހަތްތެރިވަން. މިސަރަހައްދަށް ގިނަ އަދަދަކަށް ކޮލޮރިން އަޅާފައިވާ ކަމަށް ބެލެވޭތީ އާއްމުން މިވަގުތު އެސަރަހައްދަށް މޫދަށް އެރި ނޫޅުމަށް އިލްތިމާސްކުރަން" އެ ކައުންސިލުން ބުންޏެވެ.