މިދިޔަ ބުރާސްފަތި ދުވަހު ހިނގި ނުރައްކާތެރި އަލިފާނުގެ ހާދިސާއާ ގުޅިގެން ބޭނުން ނުކުރެވޭ ވަރަށް އެނދި އިމާރާތް ހުރި ބިން ސާފުކުރުމުގެ މަސައްކަތް މިނިސްޓްރީ އޮފް ސިޓީސް, ލޯކަލް ގަވަމެންޓް ޕަބްލިކް ވޯކްސް އިން މިއަދު ފަށައިފި އެވެ.

އަލިފާން ރޯވި އިމާރާތުގައި ހިންގަނީ ހައުސިން މިނިސްޓްރީ، އިންފްރާންސްޓްރަކްޗާ މިނިސްޓްރީ އަދި އެންވަޔަރަމަންޓް މިނިސްޓްރީގެ އިތުރުން މާލޭ ސިޓީ ކައުންސިލުގެ ތިން ސެކްޝަނެކެވެ.

މިކަމާ ގުޅިގެން ލޯކަލް ގަވަމަންޓް މިނިސްޓަރު އާދަމް ޝަރީފް އުމަރު އެކްސްގައި ކުރެއްވި މެސެޖެއްގައި ވިދާޅުވީ ބުރާސްފަތި ދުވަހު ހިނގި ނުރައްކާތެރި އަލިފާނުގެ ހާދިސާއާ ގުޅިގެން މިހާރު ބަންދު ކޮށްފައިވާ އަމީނީމަގުގެ އެ ސަރަހައްދު މާދަމާ ހުޅުވާލެވޭވަރު ވާނެކަމަށް ލަފާކުރެވޭ ކަމަށެވެ.

މި ހާދިސާގައި އިމާރާތަށް ބޮޑެތި ގެއްލުންތަކެއް ލިބި، ތިން މިނިސްޓްރީގެ ޚިދުމަތް ވަގުތީ ގޮތުން މެދުކެނޑިފައިވާއިރު، އެ އިމާރާތުގައި ހިންގި މާލެ ސިޓީ ކައުންސިލްގެ ބަޔަކަށް ވެސް ގެއްލުންތަކެއް ލިބި، އެކަައުންސިލްގެ ޚިދުމަތްތަކަށް ވެސް ވަނީ ބުރޫއަރާފަ އެވެ.

އެހެންކަމުން ގެއްލުންވި ތިން މިނިސްޓްރީގެ މަސައްކަތްތައް މިހާރު ވަނީ ދަރުބާރުގެއަށް ވަގުތީގޮތުން ބަދަލުކޮށްފަ އެވެ.

ހުކުރު ދުވަހު ނޫސްވެރިންނާ ވާހަކަ ދައްކަވަމުން ހައުސިން މިނިސްޓަރު ޑރ. އަލީ ހައިދަރު އަހުމަދު ވިދާޅުވީ، އަންނަ އާދިއްތަ ދުވަހު ހައުސިން މިނިސްޓްރީގެ ޚިދުމަތްތައް ދަރުބާރުގޭގައި އާންމުންނަށް ދެވޭނެހެން އިންތިޒާމު ހަމަޖެއްސޭނެ ކަމަށެވެ.

ބުރާސްފަތި ދުވަހު ހިނގި އަލިފާނުގެ ހާދިސާއާއި ގުޅިގެން އެއްވެސް މީހަކަށް އަނިޔާވެފައެއް ނުވެއެވެ. އަދި ހާދިސާ ހިނގަން މެދުވެރިވި ސަބަބު ވެސް އަދި ވެސް ވަނީ ސާފުވާގޮތް ނުވެފަ އެވެ.