މާލޭގެ ތިން ސަރަހައްދެއްގައި ރޭ މާރާމާރީ ހިންގައިފި އެވެ.

މާރާމާރީތަކާ ގުޅިގެން ފުލުހުން ބުނީ މާރާމާރީ ހިންގާފައި ވަނީ މާފަންނު މުނިޔާމަގުގައި ހުންނަ ޑިޕަބްލިކް ކެފޭ ތެރޭގައި އާއި ޝަހީދު ކުޑަނެވި ތުއްތު މަނިކު ހިނގުމުގައި ހުންނަ ކިންޒާ ކެފޭ ކުރިމަތީގަ އާއި ހެންވޭރު ފިލިގަސް މަގުގައި ހުންނަ ނޫރު މިސްކިތް ކައިރީގައި ކަމަށެވެ.

ފުލުހުން ބުނީ ސައިކަލެއްގައި އައި ހެލްމެޓް އަޅައިގެން ތިބި ބަޔަކު، މުނިޔާމަގު ދިރިޕަބްލިކް ކެފޭ ތެރެއަށް ވަދެ މާރާމީރީ ހިންގި މައްސަލައަކާއި ހަ މީހަކު ސައިކަލްގައި އައިސް ޝަހީދުކުޑަނެވި ތުއްތުމަނިކު ހިނގުމުގައި ހުންނަ ކިންޒާ ކެފޭ ކުރިމަތީ ތޫނުހަތިޔާރު ބޭނުންކޮށްގެން މާރާމާރީ ހިންގާފައިވާ މައްސަލައެއް ރޭ ފުލުހުންނަށް ރިޕޯޓްކޮށްފައިވާކަމަށެވެ.

މީގެ އިތުރުން ފިލިގަސްމަގު ނޫރު މިސްކިތް ކައިރީގައި ބަޔަކު މީހުން މާރާމާރީ ހިންގި މައްސަލައެއްވެސް ރޭ ފުލުހުންނަށް ރިޕޯރޓްކޮށްފައިވާކަމަށް ފުލުހުން ބުންޏެވެ.

ޑިސެމްބަރު 12 ވަނަ ދުވަހު ހުށަހެޅުނު ލެޓްސްގޯ ކެފޭއަށް ބަޔަކު ވަދެ ގެއްލުންދިން މައްސަލަ ފުލުހުން ގެންދަނީ ތަހުގީގު ކުރަމުން ކަމަށް ފުލުހުން ބުނެ އެވެ.

މި މައްސަލަތައް ފުލުހުން ތަހުގީގުކުރަމުން ދާއިރު، މީގެން އެއްވެސް މާރާމާރީއެއްގައި މީހަކަށް އަނިޔާއެއް ވިކަމެއް ނުވަތަ އެކަމާއި ގުޅޭ އިތުރު ތަފްސީލެއް ފުލުހުން ނުދެ އެވެ. އަދި އެ މާރާމާތީތަކާ ގުޅިގެން މީހަކު ހައްޔަރުކުރި ކަމެއް ވެސް އަދި ފުލުހުން ހާމައެއް ނުކުރެ އެވެ.

މާލެ ސަރަހައްދުގައި ސިލްސިލާ މާރާމާރީތަކެއް ހިނގަމުންދާއިރު، މިއަހަރުގެ މިހާތަނަށް 659 މާރާމާރީ ފުލުހަށް ރިޕޯޓްކޮށްފައިވާކަމަށް ތަފާސްހިސާބުތަކުން ދައްކަ އެވެ.