އެއްގަމު އަދި ކަނޑު އުޅަނދުތަކުގެ އަހަރީ ފީ އާއި އެ ފީ ނުދެއްކުމުން އަރާފައިވާ ޖޫރިމަނާތައް ބަހާލައިގެން، އިންސްޓޯލްމަންޓް އުސޫލުން ދެއްކުމުގެ ފުރުސަތު ލިބޭ ގޮތަށް ޓްރާންސްޕޯޓް މިނިސްޓްރީން ހަމަޖައްސައިފި އެވެ.

ޓްރާންސްޕޯޓް މިނިސްޓްރީން ވަނީ އެއްގަމު އުޅަނދާއި ކަނޑު އުޅަނދު ފަހަރާ ގުޅޭގޮތުން ދައްކަން ޖެހޭ އަހަރީ ފީ އާއި ޖޫރިމަނާގެ ފައިސާ ބަހާލައިގެން ދެއްކުމުގެ ގަވާއިދު ގެ ނަމުގައި ގަވާއިދެއް މިއަދު ގެޒެޓްކޮށްފަ އެވެ.

މިނިސްޓްރީގެ އެ ގަވާއިދުގެ މަގްސަދަކީ އަހަރީ ފީ އާއި އެ ފައިސާ ނުދެއްކުމުގެ ސަބަބުން އަރާފައިވާ ޖޫރިމަނާގެ ފައިސާ އެކީ އެއް ފަހަރާ ދައްކަން ދަތިވާ ފަރާތްތްކަށް ލުއިފަސޭހަ އިންތިޒާމެއް ހަމަޖެއްސުންކަމުގައި ޓްރާންސްޕޯޓް މިނިސްޓްރީން ބުނެއެވެ.

ޓްރާންސްޕޯޓް މިނިސްޓްރީގެ އެ ގަވާއިދުގައިވާ ގޮތުން ފަސް ޝަރުތެއް ހަމަވާ މީހުންނަށް އަހަރީ ފީ އާއި ޖޫރިމަނާގެ ފައިސާ ބަހާލައިގެން ދައްކަން ފުރުސަތު ދެވޭނެ އެވެ.

އެގޮތުން ދައްކަން ޖެހި ނުދައްކާ ހުރި ފައިސާގެ އަދަދު 10،000ރ. އަށް ވުރެ އިތުރުވެފައިވުމާއި ފައިސާ ދެއްކުމުގެ މުއްދަތު ހަމަވެފައިވުމާއި ގަވާއިދުގެ ދަށުން ފައިސާ ބަހާލައިގެން ދައްކަން އަމިއްލައަށް ހުށަހެޅުމާއި މީގެކުރިން ބަހާލައިގެން ފައިސާ ދެއްކުމުގެ ފުރުސަތު ދީފައިވާ ފަރާތަކަށް ނުވުމުގެ އިތުރުން އެދޭ ފަރާތަކީ އުޅަނދުގެ ވެރިފަރާތް ކަމުގައިވުން ހިމެނެ އެވެ.

މިނިސްޓްރީގެ މި ގަވައިދުގައިވާ ގޮތުން ބަހާލައިގެން ޖޫރިމަނާގެ ފައިސާ ދައްކަން ފުރުސަތު ދޭނީ ކޮމިޓްމަންޓް ފީއެއް ދެއްކުމުންނެވެ. އެ ފީ ދައްކަން ލިބޭ 14 ދުވަހުގެ ތެރޭގައި ނުދައްކައިފިނަމަ، ބަހާލައިގެން ޖޫރިމަނާގެ ފައިސާ ދެއްކުމުގެ ފުރުސަތު ގެއްލޭނެ އެވެ.

ޓްރާންސްޕޯޓް މިނިސްޓްރީގެ ގަވައިދުގައި ބުނާގޮތުން ކޮމިޓްމަންޓް ފީ ދެއްކުމުން މިނިސްޓްރީން އެއްބަސްވުމެއް އެކުލަވާލާނެ އެވެ. މި އެއްބަސްވުމުގައި އިންސްޓޯލްމަންޓްގެ ގޮތުގައި ކޮންމެ މަހަކު ދައްކަން ޖެހޭ އަދަދު ކަނޑައަޅަނީ ކޮމިޓްމަންޓް ފީގެ ގޮތުގައި ދެއްކި އަދަދުން އެ ބައި އުނި ކުރުމަށް ފަހު އެވެ.

އެ ގަވާއިދުގައިވާ ގޮތުން އެއްބަސްވުމުގައި ސޮއިކުރާތާ 30 ދުވަސް ތެރޭ ފައިސާ ނުދައްކައިފިނަމަ، އެއްބަސްވުން ބާތިލް ކުރުމުގެ އިހްތިޔާރު މިނިސްޓްރީއަށް ލިބިގެންވާކަމަށް ޓްރާންސްޕޯޓް މިނިސްޓްރީގެ ގަވައިދުގައި ބުނެއެވެ.