އަހަރު ނިމިގެންދާއިރު، މި ސަރުކާރުގެ މާލީ ހިސާބުތަކުން ފެނިގެންދަނީ ސިޔާސީގޮތުން ކުރި ބޭކާރު ހަރަދުތައް ކަމަށް އިދިކޮޅު އެންމެ ބޮޑު ޕާޓީ، އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

ސަރުކާރުގެ މާލީ ހިސާބުތަކާ ގުޅޭގޮތުން ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، އަހަރު ނިމިގެން ދާއިރު، މި ސަރުކާރުގެ މާލީ ހިސާބުތަކުން ދިވެހިންގެ ހިތްތަކަށް ލިބޭ ފިނިކަމެއް، ލިބުނު ހިތްހަމަޖެހުމެއް ނުފެނުނު ކަމަށެވެ.

"އަހަރު ނިމިގެން ދާއިރު، މި ސަރުކާރުގެ މާލީ ހިސާބުތަކުން ދިވެހިންގެ ހިތްތަކަށް ލިބޭ ފިނިކަމެއް، ލިބުނު ހިތްހަމަޖެހުމެއް ނުފެނުނު. އެންމެހާ ދިވެހިން، ކޮއްޕަމުން، ލަވަމުން، ވައްދަމުން އެގެންދަނީ ނުތަނަވަސްކަމާއި ކަންބޮޑުވުމެއްގެ ތެރެއަށް. އަޅުވެތިކަމުގެ ބަނދެލުމަކުން ދިވެހިން ބަނދެލުމަށް މި ސަރުކާރުން އެވަނީ މިސްރާބު ހިފާފައި،" އޭނާ ވިދާޅުވި އެވެ.

ޝާހިދު ވިދާޅުވީ، މިދިޔަ އަހަރާ ބަލާއިރު މިއަހަރު ދައުލަތަށް ލިބުނު އާމްދަނީ 78 މިލިޔަން އިތުރުވެފައި ވީނަމަވެސް ރައްޔިތުން ބިކަވެ, ނިކަމެތިވުން ނޫން ކަމެއް ނުވި ކަމަށެވެ.

އޭނާ ވިދާޅުވީ ސަރުކާރުން އާސަންދައަށް ކުރި ޚަރަދު 101 މިލިއަން ރުފިޔާ މަދުކޮށްފައިވާކަމަށެވެ. މިކަންކަން މި ބީދައިން ހުރުމުން އިވެމުން ދަނީ ނިކަމެތި ރައްޔިތު މީހާ، އާސަންދައަށް އެދި ރޮއެ ކުރާ އާދޭހުގެ ހިތްދަތި އަޑުކަމަށް އޭނާ ވިދާޅުވި އެވެ. ކަން މިހެން ހުރިނަމަވެސް ސިޔާސީ މުސާރައާ ގުޅުންހުރި ހަރަދުތަކަށް 1.4 ބިލިއަން ރުފިޔާ އިތުރަށް ހަރަދުކޮށްފައިވާކަމަށް ޝާހިދު ފާހަގަކުރެއްވި އެވެ.

އަދުގެ ސަރުކާރުން ސިޔާސީ ބޭނުންތަކަށް ކުރާ ހޭދަ އިތުރުވަމުން އަންނަކަމަށް ޝާހިދު ފާހަގަކުރައްވާފައިވާއިރު، މިއަހަރުގެ ޑިސެމްބަރު މަހުގެ ފަސް ވަނަ ދުވަހުގެ ނިޔަލަށް ދައުލަތުގެ ހަރަދުތައް 43.5 ބިލިއަން ރުފިޔާއަށް އަރާފައިވާކަމަށް މާލީ ވުޒާރާގެ ތަފާސްހިސާބުތަކުން ދައްކަ އެވެ.