ރަޝިއާއިން ކެންސަރު ބަލީގެ ވެކްސިނެއް އުފައްދައިފައިވާ ކަމަށް ދުނިޔޭގެ މީޑިއާ ރިޕޯޓުތަކުން ބުނެފި އެވެ.

ރަޝިއާގެ ނޫސް އެޖެންސީތަކުން ރިޕޯޓުކޮށްފިވާ ގޮތުގައި މި ވެކްސިން ތައްޔާރުކުރެވިފައިވާ ކަމުގެ ޚަބަރު ދީފައިވަނީ ރަޝިއާގެ ސިއްޙީ ވުޒާރާގެ ދަށުން ހިންގާ ރޭޑިއޮލޮޖީ މެޑިކަލް ރިސާޗް ސެންޓަރުންނެވެ.

ރަޝިއާގެ ނޫސްތަކުން ޚަބަރު ފަތުރާގޮތުގައި މި ޚަބަރު މީޑިއާއަށް ދީފައި ވަނީ ސިއްޙީ ވުޒާރާގެ ދަށުން ހިންގާ ރޭޑިއޮލޮޖީ މެޑިކަލް ރިސާޗް ސެންޓަރުގެ ޑިރެކްޓަރު ޖެނެރަލް އެންޑްރޭ ކަޕްރިން އެވެ.

މި ވެކްސިންއާއި ގުޅޭ ގޮތުން ރަޝިއާގެ ރޭޑިއޯއަކަށް މައުލޫމާތު ދެމުން ރޭޑިއޮލޮޖީ މެޑިކަލް ރިސާޗް ސެންޓަރުގެ ޑިރެކްޓަރު ޖެނެރަލް އެންޑްރޭ ކަޕްރިން ވިދާޅުވީ އެ ވެކްސިނަކީ ކެންސަރު ބަލި ޖެހިފައިވާ މީހުންނަށް ދިނުމަށް ތައްޔާރުކޮށްފައިވާ އެއްޗެއް ކަމަށާއި، މިއީ ކެންސަރު ޖެހުނަ ނުދިނުމަށް ދޭ އެއްޗެއް ނޫން ކަމަށް ވެސް ބުނެފައިވެ އެވެ.

މީގެ އިތުރުން މި ވެކްސިނަކީ ކޮންމެ ބަލިމީހަކަށް ވެސް އެ މީހެއްގެ ހާލަތަށް ޚާއްޞަކޮށްގެން ތައްޔާރުކުރާނެ ވެކްސިނެއް ކަމަށް ރޭޑިއޮލޮޖީ މެޑިކަލް ރިސާޗް ސެންޓަރުގެ ޑިރެކްޓަރު ޖެނެރަލް އެންޑްރޭ ކަޕްރިންއާއި ހަވާލާދީ ރަޝިއާގެ މީޑިއާ ރިޕޯޓުތައްކުގައި ބުނެފައިވެ އެވެ.

މީގެ ކުރިން، މޮސްކޯގައި ހުންނަ ގަމަލޭޔާ ނެޝަނަލް ރިސާޗް ސެންޓަ ފޯ އެޕިޑެމިއޮލޮޖީ އެންޑް މައިކްރޯބައޮލޮޖީގެ ޑިރެކްޓަރު އަލެކްސެންޑާ ގިންޓްސްބާގް ވަނީ މި ވެކްސިނުން ހަށިގަނޑުގައި ކެންސަރު ފެތުރުން ހުއްޓުވޭނެ ކަމަށް ވިދާޅުވެފަ އެވެ.

އެހެން ނަމަވެސް، މި ވެކްސިނުން ފަރުވާ ދެވޭނީ ކޮން ބާވަތެއްގެ ކެންސަރުތަކަކަށް ކަމާއި އޭގެ ނަތީޖާއާ ގުޅޭ ގޮތުން މިހާތަނަށް އެއްވެސް މައުލޫމާތެއް އެ ފަރާތުން ހިއްސާކޮށްފައިނުވެ އެވެ.

ރަޝިއާއިން ކެންސަރަށް ވެކްސިނެއް ތައްްޔާރުކުރި ވާހަކަ މީޑިއާތަކުގައި ދެކެވޭއިރު، ކެންސަރަކީ މުޅި ދުނިޔޭގައި ވެސް އެންމެ ގިނައިން މީހުން ފަރުވާ ހޯދާ އެއް ބަޔެވެ. އަދި އެ ބަލީގައި މަރުވަމުން ދާ މީޙުންގެ އަދަދުވެސް އިތުރު ކަމަށް ތަފާސްހިސާބުތަކުން ދައްކަ އެވެ.