ވެރިކަންކުރާ ޕީއެންސީގެ ނައިބު ރައީސް އަދި ބާރަށު ދާއިރާގެ މަޖިލިސް މެމްބަރު އިބްރާހީމް ޝުޖާއު ހިމެނޭހެން ޖުމްލަ 11 މީހަކަށް އުސޫލުތަކާ ހިލާފަށް އެޗްޑީސީން ބިން ވިއްކިކަން ފަޅާއަރައިފި އެވެ.

ހަސަން ކުރުސީގެ ނަމުގައި ހިންގާ އެކްސް އެކައުންޓުން ވަނީ އެކަން ފަޅާއަރުވާލާފަ އެވެ. ޝުޖާއުއަށް ބިން ވިއްކުމާ ގުޅޭ ލިޔުންތަކުގެ ކޮޕީ އެ އެކައުންޓުން ވަނީ ލީކްކޮށްލާފަ އެވެ.

އެޗްޑީސީން ޝުޖާއުއަށް ދޫކޮށްފައިވާ "ހޭޑްއޯވާ ނޯޓް"ގެ ލިޔުމުގައި ބުނެފައިވާގޮތުން އެ ބިން އޭނައާ ހަވާލުކޮށްފައި ވަނީ މިދިޔަ އޮގަސްޓް މަހުގެ 15 ވަނަ ދުވަހު އެވެ.

ޝުޖާއުއަށް 2,196.37 ސްކޮޔާ ފޫޓުގެ ބިމެއް ވިއްކާފައި ވަނީ 67.45 ޕަސެންޓްގެ ޑިސްކައުންޓާއެކު އެވެ. ހުޅުމާލޭގެ އެންމެ މުހިންމު ސަރަހައްދުން އެ ބިން ވިއްކާފައި ވަނީ 6,589,110 ރުފިޔާ އަށެވެ. އެ ބިން ވިއްކީ ސްކޮޔާ ފޫޓަކަށް 3000 ރުފިޔާގެ ރޭޓުންނެވެ. އެކަމަކު މާކެޓްގައި އެ ބިންތަކުގެ އަގުހުރީ ސްކޮޔާ ފޫޓަކަށް 9,220ގެ ރޭޓުންނެވެ.

އެ ބިންތައް ވިއްކާފައި ވަނި ބިޑްކުރުމެއް ނެތި އެވެ. އެނގިފައިވާގޮތުގައި ބިންވިއްކަން ޖެހޭ 11 މީހެއްގެ ލިސްޓެއް ފަޒުލް އެޗްޑީސީގެ ބޯޑަށް ހުށަހެޅި އެވެ. އެ ލިސްޓް ބޯޑަށް ހުށަހެޅުމަށްފަހު ބޯޑު މެމްބަރުން އަރިހު އޭނާ ދެންނެވީ އެއީ "ރައީސް ވިދާޅުވި މީހުންގެ ލިސްޓެއް" ކަމަށެވެ. އެ މީހުންނަށް އެ ބިންތައް އަވަހަށް ވިއްކަނީ އެޗްޑީސީއަށް ފައިސާ ހޯދުމަށް ކަމަށް ވެސް ފަޒުލް ބޯޑަށް ހުށަހެޅި ރަސްމީ ލިޔުމެއްގައިވެ އެވެ.

އެޗްޑީސީގެ ބޯޑު މެމްބަރުން

މިދިޔަ އަހަރުގެ ޑިސެމްބަރު ހަ ވަނަ ދުވަހު އެޗްޑީސީގެ ބޯޑުން ވަނީ، އެ ބިންތައް ވިއްކުމަށް ފަޒުލްއަށް ފަސޭހަކޮށްދިނުމުގެ ގޮތުން ނިންމުމެއް ނިންމާފަ އެވެ. އެގޮތުން އެމަޖެންސީ ހާލަތްތަކުގައި ޑިސްކައުންޓާއެކު ބިންތައް ވިއްކުމުގެ ހުއްދަ ފަޒުލްއަށް ދިނުމަށް ބޯޑުން ފާސްކުރި އެވެ.