އެމެރިކާގެ ނިއުޔޯކްގެ ރޭލެއްގެ ތެރޭގައި ނިދާފައި އޮތް އަންހެނެއްގެ ގައިގައި އަލިފާން ރޯކޮށްލައި އެމީހާ މަރާލައިފި އެވެ.

ނިއު ޔޯކްގެ ފުލުހުން ބުނި ގޮތުގައި އަންހެން މީހާގައިގަ އަލިފާން ރޯކޮށްލާފައި ވަނީ އޭނާ ދަންނަ މީހެއް ނޫން ކަމަށެވެ.

އޭނާ ގައިގަ ރޯކޮށްލި މީހާ ވަނީ އޭނާ ކައިރިއަށް ގޮސް ވަރަށް "ހަމަޖެހިގެން" ހުރެ ލައިޓަރަކުން އޭނާގެ ގައިގައި އަލިފާން ރޯކޮށްލާފަ އެވެ. އެ އަންހެން މީހާ ގައިގަ ރޯވެ، މަރުވެފައިވަނީ ސިކުންތު ކޮޅެއްގެ ތެރޭގަ އެވެ. އޭނާ ގައިގަ ރޯކޮށްލި މީހާގެ އަމަލުތައް ސީސީޓީވީ ފުޓޭޖްއިން ފެންނަން އެބަހުރި ކަމަށް ފުލުހުން ވަނީ ބުނެފަ އެވެ.

މިއީ ނިއުޔޯކްގައި މިހާތަނަށް ހިނގި އެންމެ ނުބައި ކުށް ކަމަށް ސިޓީގެ ފުލުހުންގެ ކޮމިޝަނަރު ޖެސިކާ ޓިޝް ވަނީ ސިފަކޮށްފަ އެވެ. އެމީހާ އެތަނުން ފިލާފައި ވަނީ ފުލުހުން ސީންއަށް އައި ތަނާ އެވެ. ފުލުހުންގެ ބޮޑީ ކެމެރާތަކުން ކުށް ކުރި މީހާ ސާފުކޮށް ފެންނަން ހުރުމާއެކު އޭނާ ވަނީ ފަސޭހައިން ދެނެގަނެވި، މިހާރު ހައްޔަރުކޮށްފަ އެވެ.

އެ މީހާއަކީ 2018 ގައި ގުއަޓަމަލާއިން އެމެރިކާއަށް ހިޖުރަކުރި ފިރިހެނެކެވެ.