ޓޫރިޒަމް މިނިސްޓްރީގެ ސްޓޭޓް މިނިސްޓަރު މުޙައްމަދު ނިހާދު މިއަދު ސަސްޕެންޑުކޮށްފި އެވެ.

ނިހާދު ސަސްޕެންޑްކޮށްފައި މިވަނީ ރޭ ބޭއްވި ޕީއެންސީ ހަރުގެ ޖަލްސާގައި އެމްޑީޕީން ރާއްޖޭގެ ޓޫރިޒަމްއަށް އަމާޒުކޮށް ޓެރަރިޒަމްގެ އަމަލެއް ހިންގަން އުޅޭކަމަށް ތުހުމަތުކުރައްވާ ދެއްކެވި ވާހަކައާ ގުޅިގެންނެވެ.

ނިހާދު ވިދާޅުވީ އެކަމުގައި އިސްކޮށް އުޅެނީ ދައުލަތުގެ މާލިއްޔާއިން އަށް ރުފިޔާއަށް ޕެނަޑޯލް ގުޅައެއް ވިއްކި މީހަކު ކަމަށެވެ. ނަމަވެސް އެއީ ކާކު ކަމެއް ނިހާދު ވިދާޅެއްނުވެ އެވެ.

އޭނާ ވިދާޅުވީ ރާއްޖޭގައި ހިންގާ ފައިވްސްޓާ ފެންވަރުގެ ރިސޯޓްތަކަށް އަމާޒުކޮށްގެން އެ ހަމަލާ ދޭން އުޅުމުގައި އެމްޑީޕީގެ ލީޑާޝިޕްގެ "ބްރޯ" ވެސް އެކަމުގައި ބައިވެރިވާ ކަމަށެވެ. އަދި އެ ކަމަކަކީ ރާއްޖޭގެ ފަތުރުވެރިކަން ހަވާލުކޮށްލުމަށް ހިންގާ ކަމެއް ކަމަށް ނިހާދު ވިދާޅުވި އެވެ.

ނިހާދުގެ މި ވާހަކަތަކާއި ގުޅިގެން އެމްޑީޕީން ވަނީ އެކަން ކުއްވެރިކޮށް ބަޔާނެއް ނެރެފަ އެވެ.

މީގެ ކުރިން ވެސް ސަރުކާރުގެ އިސްވެރިންތަކެއް ސޯޝަލް މީޑިއާގައި ދެއްކެވި ވާހަކަތަކަކާ ގުޅިގެން ފަތުރުވެރިކަމަށް ވަރަށް ބޮޑު ހީނަރުކަމެއް އައިސްފައިވެ އެވެ.

އެގޮތުން އިންޑިއާއާއި އެގައުމުގެ ބޮޑުވަޒީރަށް ނިސްބަތްކޮށް ދެއްކެވި ވާހަކަތަކުގެ ސަބަބުން އިންޑިއާގެ މަޝްހޫރުތަރިން ހިމެނޭގޮތަށް ރާއްޖެ ބޮއިކޮޓް ކުރުމަށް ގޮވާލާ ކެމްޕޭނެއްވެސް ވަނީ ކުރިއަށް ގެންގޮސްފަ އެވެ. އެކަމުގެ ނަތީޖާއެއްގެ ގޮތުން އިންޑިއާގެ ފަތުރުވެރިން ރާއްޖެއައުން އިންތިހާއަށް މަދުވެ، އެކަމުގެ އަސަރު ޓޫރިޒަމަށް ވަނީ ކޮށްފަ އެވެ.