މިފަހުން ރޫޅުނު އެންޖެލީނާ ޖޯލީއާއި ބްރެޑް ޕިޓްގެ ކައިވެނި ރޫޅުމަށްފަހު އެންޖެލީނާ އިތުރަށް މުއްސަނދި ވެއްޖެ ކަމަށް ހަބަރުތައް ބުނެފި އެވެ.

އެގޮތުން 8 އަހަރުގެ ގާނޫނީ މަރުހަލާތަކަކަށްފަހު އެންޖެލީނާއާއި ބްރެޑްގެ ކޯޅުން މިދިޔަ މަހު ނިމުމަކަށް އައިސްފައިވާއިރު ދެތަރިންގެ މުދާ ބެހުމާއެކު އެންޖެލީނާއަށް ވަނީ 80 މިލިއަން ޑޮލަރުގެ ބޮޑު އަދަދެއް ލިބިފަ އެވެ.

ހުޅަނގުގެ ގައުމުތަކުގައި ކައިވެންޏެއް ރޫޅުމާއެކު ކައިވެނި ކޮށްގެން އުޅުނުއިރު ދެމީހުން އެއްކޮށް ހޯދާފައިވާ މުދާ ބެހުމަކީ އާއްމު ކަމެކެވެ.

އެހެން ކަމުން އެންޖެލީނާ އޭނާގެ ހަޔާތުގެ މުހިއްމު ބާބެއް ނިންމާލަނީ އެކަމުން ބޮޑު މާލީ ފައިދާއެއް ހޯދުމަށް ފަހުގައި ކަމަށް ގިނަ ބަޔަކު އަންނަނީ ބުނަމުންނެވެ.

ގާތްގަނޑަކަށް 20 އަހަރު ދުވަހު ކައިވެނި ކޮށްގެން އުޅުމަށްފަހު ބްރެޑްއާއި އެންޖެލީނާގެ ވަރިވެފައި މިވަނީ 2016 ވަނަ އަހަރުން ފެށިގެން ވަކިވަކިން އުޅުމަށްފަހު އެވެ.

އެ ދެމީހުންގެ ލޯބި ފެށިގެން އައީ 2004 ވަނަ އަހަރު ނުކުތް "މިސްޓަ އެންޑް މިސިސް ސްމިތު"ގައި އެއްކޮށް މަސައްކަތް ކުރުމުގެ ތެރޭގަ އެވެ.