ކުރީގެ ރައީސް މުހައްމަދު ނަޝީދު އުފެއްދެވި ދަ ޑިމޮކްރެޓްސް ރޫޅި އެ ޕާޓީގެ އިސް ސަފުގައި ހަރަކާތްތެރިވާ ބައެއް ބޭފުޅުން އިދިކޮޅު އެމްޑީޕީއާ ގުޅެން ފަށައިފި އެވެ.

އެގޮތުން ޑިމޮކްރެޓްސްގެ ނައިބު ރައީސް މުހައްމަދު ޝިފާޒު އާއި އެ ޕާޓީގެ ކައުންސިލް މެންބަރު ރައްޔިތުންގެ މަޖިލީހުގެ މެދުހެންވޭރު ދާއިރާގެ ކުރީގެ މެމްބަރު އަލީ އާޒިމް ވަނީ އެމްޑީޕީ އަށް ސޮއިކޮށްފަ އެވެ.

ޝިފާޒު އާއި އާޒިމުގެ އިތުރުން، އެމްޑީޕީގައި ކުރިން އިސް ދައުރެއް އާދަކުރަމުން ދިޔަ އިބްރާހިމް ރަޝީދު (މާމިގިލީ އިބޫ) ވެސް ދަ ޑިމޮކްރެޓްސް އިން ވަކިވެ އެމްޑީޕީ އަށް އިއްޔެގެ ވަގުތެއްގައި ވަނީ ސޮއި ކޮށްފަ އެވެ.

ރިޔާސީ އިންތިހާބުގައި ޑިމޮކްރެޓްސްގެ ކެނޑިޑޭޓުގެ ރަނިން މޭޓުގެ ގޮތުގައި ވާދަކުރެއްވި، ކުރީގެ އެސްޓީއޯގެ މެނޭޖިން ޑިރެކްޓަރު ހުސެން އަމްރު ވެސް ވަނީ އެމްޑީޕީއަށް ސޮއިކޮށްފަ އެވެ.

އަމްރު އެނބުރި އެމްޑީޕީ އަށް އައުމާއެކު އެކަމަށް މަރުހަބާ ކިޔައި ރައްޔިތުންގެ މަޖިލީހުގެ ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒު އެކްސްގައި ރޭ ކުރެއްވި ޕޯސްޓެއްގައި ބުނީ ސިޔާސީ އިސްލާހީ މަސައްކަތުގައި އަބަދުވެސް އެންމެ މުހިއްމު މަސައްކަތެއް ކުރެވޭނެ ޖާގަ އޮންނާނީ އެމްޑީޕީގައި ކަމަށާއި، ސިޔާސީ ކުރިމަގު ހޯދަން އެދޭ ކޮންމެ މީހަކަށް އެމްޑީޕީ އޮތީ ތަންމިނަށް ހުޅުވިފައި ކަމަށެވެ.

އެމްޑީޕީގެ ވެރިކަމުގައި އެ ޕާޓީ ދެ ބައިވެ، ކުރީގެ ރައީސް ނަޝީދަށް ތާއީދުކުރާ ފަރާތްތަކާއެކު ދަ ޑިމޮކްރެޓްސް އުފެއްދެވުމަށްފަހު ރައީސް ނަޝީދުވަނީ އެމްޑީޕީ "ރޫޅާލާނެ" ކަމަށް ވިދާޅުވެފަ އެވެ.