މިދިޔަ އަަހަރު ނޮވެންބަރު މަހު އެމެރިކާގެ ރިޔާސީ އިންތިހާބު ކާމިޔާބުކުރި އެމެރިކާގެ ކުރީގެ ރައީސް ޑޮނާލްޑް ޓްރަމްޕް ދެވަނަ ފަހަރަށް މަގާމާ ހަވާލުވުމުގެ ހުވާކުރުން މި މަހު 20 ގައި ބާއްވަން ނިންމައިފި އެވެ.

ހުވާކުރުން ބޭއްވުމަށް ހަމަޖެހިފައިވަނީ ވޮޝިންޓަން ޑީސީގަ އެވެ. ހުވާކުރުމުގެ ހަފްލާއަކީ ގިނަ އަދަދެއްގެ ރައްޔިތުން ބައިވެރިވާ ހަފްލާއެކެވެ.

އާންމުކޮށް ރައީސް ހުވާކުރާ ދުވަހަކީ ރަސްމީ ބަންދު ދުވަހަށް ނުވިނަމަވެސް މި އަހަރު މި ދުވަހަކީ އެމެރިކާގެ ނެޝަނަލް ދުވަހެއް ކަމަށްވާ މާޓިން ލޫތާ ކިންގް ދުވަސްކަމަށް ވެސް ވުމާއެކު ޓްރަމްޕް ހުވާ ކުރައްވާ ދުވަސްވަނީ އިތުރަށް ހާއްސަވެފަ އެވެ. މިއީ 1997 ގެ ފަހުން މި ހުވާކުރާ ދުވަސް މި ދުވަހާ ދިމާވާ ފުރަތަމަ ފަހަރެވެ.

އެމެރިކާގައި ކޮންމެ އާ ރައީސްއަކަށް ވެސް ހާއްސަ އިންއޯގޮރޭޝަން ފަންޑަށް ޕްރައިވެޓް ކުންފުނިތަކުން ފައިސާ ހަދިޔާ ކުރުމަކީ އާންމު ކަމެކެވެ. އެގޮތުން ޓްރަމްޕްގެ ފަންޑަށް ގޫގުލް އަދި ބޮއިންގް ފްލައިޓް ބްރޭންޑްއިން ވަނީ 1 މިލިއަން ޑޮލަރު ހަދިޔާކޮށްފަ އެވެ. އަދި ބޮޑެތި ކާރު ކުންފުނިތަކުގެ ތެރެއިން ފޯޑް، ޖެނެރަލް މޯޓޯސް އަދި ޓޮޔޯޓާ އިން ވަނީ ކޮންމެ ކުންފުންޏަކުން 1 މިލިއަން ޑޮލަރު ހަދިޔާކޮށްފަ އެވެ.

ޓްރަމްޕް ހުވާ ކުރުމުގެ ރަސްމިއްޔާތަށް އެހެން ގައުމުތަކުގެ ވަރަށް ގިނަ އިސް ލީޑަރުންނަށް ވަނީ ދައުވަތު ދެއްވާފަ އެވެ. އެގޮތުން މި ހަފްލާއަށް ޗައިނާގެ ރައީސް ޝީ ޖިންޕިން އަށް ދައުވަތު ދިން ނަމަވެސް އޭނާ ވަޑައިގަންނަވަން ބޭނުންފުޅު ނުވާކަމަށް ވަނީ ވިދާޅުވެފަ އެވެ.

ހުވާކުރެއްވުމާއެކު ޓްރަމްޕް ވެގެންދާނީ އެމެރިކާގެ 47 ވަނަ ރައީސްއަށެވެ.