ބޮލީވުޑްގެ މަޝްހޫރު ދެތަރިން ކަމަށްވާ ސަލްމާން ޚާންއާއި ކަންގަނާ ރަނޯޓްއަކީ ވަރަށް ގާތް ދެ އެކުވެރިން ކަމަށް ބުނެވޭ ދެ ތަރިންނެވެ. އެހެން ނަމަވެސް މިއަދާ ހަމައަށް ވެސް އެދެތަރިން އެކުގައި އެއްވެސް މަސައްކަތެއް ކޮށްފައެއް ނުވެ އެވެ.

އިންޑިއާގެ ނޫހަކަށް ދިން އިންޓަވިއުއެއްގައި ކަންގަނާ ވަނީ އެދެމީހުންގެ ގުޅުމާއި މިހާތަނަށް އެކުގައި ބޮލީވުޑްގެ މަސައްކަތެއް ކޮށްފައިނުވާ ސަބަބާ ބެހޭގޮތުން ވެސް ވާހަކަ ދައްކާފަ އެވެ.

ކަންގަނާ ބުނީ ސަލްމާންއާއެކު މަސައްކަތް ކުރަން އޭނާއަށް ގިނަ ފުރުސަތުތަކެއް ލިބުނު ކަމަށާއި އެހެން ނަމަވެސް ކޮންމެ ފަހަރަކު ވެސް އެކި ސަބަބުތަކާހެދި އެ ފުރުސަތު ގެއްލެނީ ކަމަށެވެ.

"ސަލްމާންއަކީ ވަރަށް ގާތް އެކުވެރިއެއް. އެކުގައި މަސައްކަތް ކުރުމުގެ ފުރުސަތު ވެސް ލިބުނު. އެކަމަކު ވެސް ކޮންމެވެސް ކަމެއް ވެގެން އެކަމެއް ކުރިއަކަށް ނުދޭ" ކަންގަނާ ބުނެފައިވެ އެވެ.

ކަންގަނާ އިތުރަށް ބުނީ ސަލްމާންއަކީ މިވަގުތު ބޮލީވުޑްގައި ހުރި އެންމެ ކާމިޔާބު ތަރި ކަމަށާއި އެހެން ނަމަވެސް އޭނާއަށް ނަފްރަތުކުރާ މީހުންނަށް އޭނާގެ އެއްވެސް ރަނގަޅު ކަމެއް ނުފެންނާނެ ކަމަށެވެ.

ބޮލީވުޑްގައި ކަންގަނާގެ ކުރިއަށް އޮތް މަސައްކަތަކީ އޭނާ އެންމެ ފުރަތަމަ ފަހަރަށް ޑައިރެކްޓްކުރާ ފިލްމު "އެމަޖެންސީ" އެވެ. އެ ފިލްމުގެ ލީޑު އެކްޓަރަކީ ވެސް ހަމަ ކަންގަނާ އެވެ.

އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ހަޔާތުގެ މައްޗަށް ބިނާކޮށްފައިވާ އެ ފިލްމު ރިލީޒް ކުރުން އެކި ފަހަރު މަތިން ފަސްކުރެވިފައިވާއިރު މިހާރު އެ ފިލްމު ރިލީޒް ކުރަން ހަމަޖެހިފައިވަނީ މިމަހުގެ 17 ވަނަ ދުވަހު އެވެ.