ދައުލަތަށް ދައްކަންޖެހޭ ފައިސާއެއް ދެއްކުމުގައި ލުއި ދެވޭނީ ރައީސުލްޖުމްހޫރިއްޔާގެ ހުއްދަ ހޯދައިގެން ކަމަށް ނިންމައި އުސޫލެއް އާންމުކޮށްފި އެވެ.

މިއަދު ފިނޭންސް މިނިސްޓްރީން ނެރުނު އުސޫލުގައި ބުނެފައިވަނީ ދައުލަތުގެ އޮފީސްތަކުންނާއި ޓޫރިޒަމް މިނިސްޓްރީން އެ ތަނަކަށް ދައްކަން ޖެހޭ ފައިސާއެއް ދެއްކުމުގައި ލުޔެއް ދެވޭނީ އަދި ދައްކަން ޖެހޭ ފައިސާ މާފުކޮށްދެވޭނީ ރައީސްގެ ހުއްދަ ހޯދައިގެން ކަމަށެވެ.

މިގޮތުން ކައުންސިލްތައް ފިޔަވައި ދައުލަތުގެ އެހެން އޮފީސްތަކުން މުއާމަލާތެއްގައި މީހަކަށް ލުޔެއް، މަންފާއެއް ނުވަތަ މާފު ދިނުމަށް ހުށަހަޅާ ހާލަތްތަކުގައި ކަންކުރަން ޖެހޭ ގޮތްކަމަށް އެ އުސޫލުގައި ބަޔާން ކޮށްފައިވެ އެވެ.

އޭގެތެރޭގައި ހުށަހަޅާފައިވާ ލިޔެކިޔުންތަކާ އެކު، ބަންޑާރަ ނައިބުގެ އޮފީހުން ދެކޭ ގޮތް ބަޔާންކޮށް ފޮނުވާ ލިޔުމަކާއެކު ފިނޭންސް މިނިސްޓްރީއަށް ހުށަހަޅަން ޖެހެ އެވެ.

ލުއި ނުދޭން ނުވަތަ ޖޫރިމަނާ މާފު ނުކުރަން ފިނޭންސް މިނިސްޓަރަށް ނިންމޭއިރު، ލުއި ދޭން ނުވަތަ މާފު ދޭން މިނިސްޓަރަށް ފެންނަ ހާލަތުގައި ރައީސްގެ ހުއްދަ ހޯދަން ޖެހޭނެ ކަމަށް އުސޫލުގައި ބަޔާންކޮށްފައިވެ އެވެ.

ޓޫރިޒަމް ގާނޫނުގެ ދަށުން ސަރުކާރަށް ދައްކަން ޖެހޭ ކުލި ނުވަތަ ކުލި ނުދައްކައިގެން އަރާފައިވާ ޖޫރިމަނާ އާއި އިސްޓްރެސްޓް ބަހާލައިގެން ވަކި ގޮތަށް ދައްކަން ލުއި ދިނުމާއި މާފު ދިނުމަށް ނިންމާ ހާލަތުގައި ވެސް ރައީސްގެ ހުއްދަ ހޯދަން ޖެހޭނެ ކަމަށް އެ އުސޫލުގައި ބުނެފައިވެ އެވެ.

އެގޮތުން ޓޫރިޒަމާ ގުޅުން ހުރި މިފަދަ ފައިސާގެ މުއާމަލާތްތަކުގައި ލުއި ދެވޭނީ ފުރަތަމަ ދައްކަން ޖެހޭ ފައިސާ ނުވަތަ އަޕްފްރަންޓް ފައިސާ އެއްކޮށް ދައްކައި ހަލާސްކުރުމުން ކަމަށް ވެސް އުސޫލުގައިވެ އެވެ.

ދައުލަތުގެ އޮފީސްތަކާއި ޓޫރިޒަމް މިނިސްޓްރީން މީހަކަށް މި ގޮތަށް ލުއި ދޭން ނުވަތަ މާފު ދޭން ރައީސްގެ ހުއްދަ ހޯދަން ޖެހުނު ނަމަވެސް ލޯކަލް ކައުންސިލްތަކަށް އެކަން ކުރާކަށް ނުޖެހެ އެވެ.