ވެރިކަން ކުރާ ޕީއެންސީއަށް މެމްބަރުން އިތުރުކުރުމަށް ހިންގި ހަރަކާތުގައި ގިނަ ބަޔަކަށް ނޭނގި އެ މީހުން ވަގަށް އެ ޕާޓީއަށް ވެެއްދި މައްސަލަ ތަހުގީގުކޮށްދިނުމަށް ތަހުގީގީ އިދާރާތަކަށް އަމުރުކޮށްދިނުމަށް އިދިކޮޅު އެމްޑީޕީން ޕްރޮސިކިއުޓާ ޖެނެރަލް އައްބާސް ޝަރީފްގެ ކިބައިން އެދިއްޖެ އެވެ.

އެމްޑީޕީން އެކްސްގައި ކުރި ޕޯސްޓެއްގައި ވަނީ ރައްޔިތުންގެ ޒާތީ މައުލޫމާތުން ވައްކަންކޮށް، ވަގު ފޯމު ފުރައިގެން ސަރުކާރު ހިންގާ ޕީއެންސީއަށް ވެއްދި މައްސަލާގައި ހިމެނޭ ޖިނާއީ ކުށްތައް ތަހުގީގު ކުރުމަށް ފުލުހުންނާއި އޭސީސީއަށް އެ ޕާޓީން ހުށަހަޅާފައިވާނެ ކަމަށެވެ. އަދި އެ މައްސަލަތައް ތަހުގީގު ކުރުމަށް އެ ދެ އިދާރާގެ މައްޗަށް އަމުރުކޮށްދެއްވުމަށް އެދި ޕީޖީގައި ވެސް އެދިފައިވާނެ ކަމަށް އެ ޕާޓީން ބުންޏެވެ.

މީގެއިތުރުން، ޕީއެންސީން ހުށަހެޅި އެއްވެސް ފޯމެއް ޕްރޮސެސް ނުކުރުމަށާއި، ޕްރޮސެސް ކުރި ފޯމުތައް ކެންސަލްކޮށް، އެ ފޯމުތަކުގެ ސައްހަކަން އަލުން ކަށަވަރުކުރުމަށް އެދި އިލެކްޝަންސް ކޮމިޝަނަށް ވެސް ސިޓީއެއް ފޮނުވާފައިވާނެ ކަމަށް އެ ޕާޓީން ބުންޏެވެ.

ހޯމް މިނިސްޓްރީ ތެރޭގައި ޕީއެންސީއަށް ފޯމް ފުރުމުގެ ކަންތައް ކުރިއަށްދިޔައިރު، އިހްސާން ހަރަކާތްތެރިވާ ފޮޓޯތަކެއް ވެސް މިހާރު ވަނީ އާންމުވެފަ އެވެ.

ސޯޝަލް މީޑިއާގައި އާންމުވެފައިވާ ފޮޓޯތަކުން ފެންނަގޮތުގައި ފޯމްތައް ފުރާއިރު، އެކަން މޮނިޓާކުރަން މިނިސްޓަރު އިހްސާން ހަރަކާތްތެރިވެ އެވެ. އަދި ޑީއެންއާރްގައިވާ ދިވެހި ރައްޔިތުންގެ ޕާސްޕޯޓް ސައިޒްގެ ފޮޓޯތައް ކަޓަރަކުން ކަފާ މަންޒަރު ފެންނަ ފޮޓޯތަކެއް ވެސް ވަނީ އާންމުވެފަ އެވެ. އެ ފޯމްތައް ފުރުމުގެ މަސައްކަތް ކުރީ ހޯމް މިނިސްޓްރީ ތެރޭގައިކަން ފޮޓޯތަކުން ކަށަވަރުވެ އެވެ.

ހޯމް މިނިސްޓްރީން ޕީއެންސީ އޮފީހަށް ހުށަހެޅި ގިނަ އަދަދެއްގެ ފޯމްތަކުގެ ތެރޭގައި ވަގު ފޯމްތައް ހިމެނޭކަން ވަނީ ފަޅާއަރައިފަ އެވެ. އެ ވަގު ފޯމްތަކުގައި ހެކީންގެ ގޮތުގައި ސޮއިކޮށްފައި ވަނީ އެ މިނިސްޓްރީގެ ސްޓޭޓް މިނިސްޓަރު ހަސަން އަލީ އާއި ސީނިއާ ޕޮލިޓިކަލް ޑިރެކްޓަރު ސޫދާ އަބްދުﷲ އެވެ.

ޕީއެންސީއަށް ވަގަށް ވައްދާފައިވާ މީހުންގެ ތެރޭގައި އިދިކޮޅު އެމްޑީޕީގެ ގައުމީ މަޖިލީހުގެ ބައެއް މެމްބަރުންނާއި ވައިކަރަދޫ ދާއިރާގެ މަޖިލިސް މެމްބަރު ހުސައިން ޒިޔާދު ވެސް ހިމެނެ އެވެ.

ވަގު ފޯމްތަކެއް އިލެކްޝަންސް ކޮމިޝަނަށް ހުށަހެޅިކަމަށް ޕީއެންސީން މިހާރު ވަނީ އިއުތިރާފުވެފަ އެވެ. އެ ޕާޓީން ބުނީ އެފަދަ މައްސަލައެއް އުޅޭނަމަ ޕާޓީގެ އޮފީހަށް އައުމުން އެކަން ހައްލުކޮށްދޭނެ ކަމަށެވެ.

އެކަމާ ގުޅިގެން ހިތްމަނުޖެހުން ފާޅުކޮށް މާފަންނު މެދު ދާއިރާގެ މެމްބަރު އަސްމާ ރަޝީދު ވިދާޅުވީ ޕީއެންސީން އިލެކްޝަންސް ކޮމިޝަނަށް ވަގު ފޯމްތަކެއް ފުރުމަކީ ވިޔާނުދާ ލަދުވެތި ކަމެއް ކަމަށެވެ.

ވަގު ފޯމްފުރުމުގައި ޑީއެންއާރްގެ ވެރިޔާ، އަދި ހޯމް މިނިސްޓްރީގެ ޑެޕިއުޓީ މިނިސްޓަރު އަހްމަދު އަލީ ހަރަކާތްތެރިވާ މަންޒަރު ވެސް އާންމުވެފައިވާ ފޮޓޯތަކުން ފެނެ އެވެ. އޭނާ ވެސް ވަނީ ބައެއް ވަގު ފޯމްތަކުގައި ހެކިވެރިޔަކަށް ސޮއިކުރައްވާފަ އެވެ.