އައްޑޫގައި ހިންގި އެންމެ ފެންވަރު ރަނގަޅު އަދި އެންމެ ބޮޑު ރިސޯޓު، ޝަންގްރިލާ ވިލިނގިލި ރިސޯޓު ނުހުޅުވި ދިގުލައިގެން ދާތީ އެންމެ ފަހުން އެރަށް ހިންގުމުގެ އެއްބަސްވުން އުވާލަން ސަރުކާރުން ނޯޓިސް ދީފި އެވެ.

ކޮވިޑް-19އާ ހެދި އައްޑޫގެ ޝަންގްރިއްލާ ވިލިގިލި ރިސޯޓް މުއްދަތެއް ނެތް ގޮތަށް ބަންދުކުރީ އޭޕްރިލް 2020 އިން ފެށިގެންނެވެ. އަދި އެ ރިސޯޓު ބަންދުކޮށްފައި އޮތުމުން ސަރުކާރަށް ގެއްލުންވާތީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ވަނީ އެ ރިސޯޓުގައި އޮތް ސަރުކާރުގެ 30 ޕަސެންޓު ވެސް ދޫކޮށްލުމުގެ އެއްބަސްވުމެއްގައި 2023 ގެ ރިޔާސީ އިންތިހާބާ ދިމާކޮށް އެ އަހަރުގެ އޮގަސްޓް މަހު ސޮއިކޮށްފަ އެވެ.

މިދިޔަ އަހަރު ޖުލައި މަހު ވެސް ޓޫރިޒަމް މިނިސްޓަރު އިބްރާހިމް ފައިސަލް ވަނީ އަމާޒަކީ ޝަންގްރިއްލާ އަލުން ހުޅުވޭނެ ތާރީހެއް 2-3 މަސް ތެރޭގައި ކަނޑައެޅުން ކަމަށް ވިދާޅުވެފަ އެވެ. ނަމަވެސް އަހަރު ނިމުނުއިރު ވެސް އެ ރިސޯޓު ނުހުޅުވި އެންމެ ފަހުން އެއްބަސްވުން އުވާލަން ޓޫރިޒަމް މިނިސްޓްރީން ވަނީ ނޯޓިސް ފޮނުވައިފަ އެވެ.

ޕީއެސްއެމްއަށް ދެއްވި އިންޓަވިއުއެއްގައި ޓޫރިޒަމް މިނިސްޓަރު ފައިސަލް ރޭ ވިދާޅުވީ ޝަންގްރިއްލާ ރިސޯޓު ނުުހުޅުވި ލަސްވަމުންދާތީ އެޓާނީ ޖެނެރަލް އޮފީހުން މިހާރު ޝަންގްރިއްލާއަށް ނޯޓިސް ދީފައިވާ ކަމަށެވެ. އަދި މިއަހަރު ތެރޭގައި ޝަންގްރިއްލާ މައްސަލައަށް ހައްލެއް ހޯދޭނެ ކަމަށް އޭނާ ވިދާޅުވި އެވެ.

"މިހާރު ވަކި ޑޭޓެއް ކިޔާކަށް ނެތިން. ޝަންގްރިއްލާ އިޝޫގައި ވެސް އަޅުގަނޑުމެން މިހާރު ވާނީ އެޓާނީ ޖެނެރަލް އޮފީހުން އަޅުގަނޑުމެންގެ ލަފައާއެކު ވަނީ ނޯޓިސްދީފައި. މިއަހަރު ތެރޭގައި ހައްލެއް ހޯދޭނެ. ދެން ރިނޮވޭޝަންއަށް ނަގާނެ ޓައިމެއް އެނގޭނީ އެތަން ބަލާލީމަ،" ފައިސަލް ވިދާޅުވި އެވެ.

އައްޑޫގައި 2008 ގައި ހުޅުވި 132 ވިލާގެ އެ ރިސޯޓަކީ ރާއްޖޭގެ އެންމެ މަތީފަންތީގެ ރިސޯޓްތަކުގެ ތެރެއިން އެއް ރިސޯޓެވެ.

ޝަންގްރިއްލާ ވިލިނގިލި ރިސޯޓް އެންޑް ސްޕާ އަކީ ގަން އިންޓަނެޝަނަލް އެއާޕޯޓުން ސްޕީޑް ލޯންޗެއްގައި ގާތްގަނޑަކަށް ފަސް ވަރަކަށް މިނިޓުން ދެވޭހާ ކައިރީގައި އޮންނަ ރިސޯޓެކެވެ. އެ ތަން އޭރު މަޝްހޫރުވީ މުއްސަނދި ޓޫރިސްޓުން ޒިޔާރަތްކުރާ ތަނެއްގެ ގޮތުގަ އެވެ. ޝަންގްރިއްލާ ހިންގި ދުވަސްވަރު އައްޑޫގެ ވިޔަފާރި ވެސް ރަނގަޅުވެ، ވަރަށް ގިނަ ޕްރައިވެޓް ޖެޓްތައް ވެސް އައްޑު އަށް ދަތުރުކުރި އެވެ.