ޑިމޮކްރެޓްސްގެ ހުސްވެފައިވާ ރައީސްގެ މަގާމަށް އިމްތިޔާޒު ފަހުމީ އަދި ފިރިހެން ނައިބު ރައީސްގެ މަގާމަށް މުހައްމަދު ވަހީދު (ވައްޑެ) އިންތިޚާބު ވެއްޖެ އެވެ.

ޑިމޮކްރެޓްސްގެ ހުސްވެފައިވާ ރައީސް އަދި ނައިބު ރައީސްކަމުގެ މަާގާމަށް ބޭފުޅުން އައްޔަން ކުރިކަން އިއުލާނު ކޮށްފައިވަނީ އެ ޕާޓީން އާދިއްތަ ދުވަހުގެ ރޭ ބޭއްވި ގައުމީ މަޖިލީހުގެ ބައްދަލުވުމަށް ފަހުގައެވެ.

ޑިމޮކްރެޓްސް އިން ބޭއްވި ގައުމީ މަޖިލީހުގެ ބައްދަލުވުމުގައި ވަނީ އެ ޕާޓީގައި އިސްކޮށް ހަރަކާތްތެރިވާ ކުރީގެ މަޖިލިސް މެންބަރުންނާއި، އާންމު މެންބަރުން ބައިވެރިވެފައެވެ. އޮންލައިންކޮށް ވެސް ޖަލްސާގައި މެންބަރުން ބައިވެރިވެފައިވާއިރު، އޭގެ ތެރޭގައި މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު (ބޮންޑޭ) އާއި ވިލުފުށީ ދާއިރާގެ ކުރީގެ މެންބަރު ހަސަން އަފީފު ހިމެނިވަޑައިގަންނަވަ އެވެ.

ރައީސްކަމުގެ މަގާމަށް އިންތި ކުރިމަތިލެއްވިއިރު 34 ވޯޓުން އެ މަގާމަށް އިންތި ހޮވައި، އެ ކަން ވަނީ އިއުލާނުކޮށްފަ އެވެ. އަދި ނައިބު ރައީސަކަށް ވައްޑޭވަނީ ހޮވައިފަ އެވެ.

އެއާއެކު، ވަގުތީ ގޮތުން ރައީސްކަމުގައި ހުންނެވި ޕާޓީގެ ނައިބު ރައީސްގެ މަޑަވެލި ދާއިރާގެ ކުރީގެ މެންބަރު މުހައްމަދު ފިރުޝާން ވަނީ ޖަލްސާގެ ރިޔާސަތު އިންތިއަށް ހަވާލުކުރައްވައިފަ އެވެ.

ޑިމޮކްރެޓްސްގެ ސިޔާސީ ހަރަކާތްތައް މަދު ނަމަވެސް މިދިޔަ ޑިސެމްބަރު މަހުގެ ތެރޭ އެ ޕާޓީން ބޮނޑިބަތް ޕާކުގައި ޖަލްސާތަކެއް ބާއްވައި އަޑުއުފުލައިފައިވެ އެވެ.

ޑިމޮކްރެޓްސްއިން މި ފަހުން ހަސަން ލަތީފާއި ޝިފާޒުގެ އިތުރަށް ޑިމޮކްރެޓްސްގެ ޕާލިމެންޓްރީ ގްރޫޕުގެ ލީޑަރުކަން ކުރެއްވި އަލީ އާޒިމާއި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ވެސް ވަނީ އެމްޑީޕީއާއި ގުޅިވަޑައިގެންފަ އެވެ.