މިހާރަކަށް އައިސް ޕިލާޓީސް ވޯކްއައުޓްތަކަކީ ސޯޝަލް މީޑިއާ، ހާއްސަކޮށް ޓިކްޓޮކްގައި މަޝްހޫރުވެފައިވާ ކަސްރަތެކެވެ. މާބޮޑަށް ރާއްޖޭގައި މި ވައްތަރުގެ ކަސްރަތު މަޝްހޫރުވެފައި ނުވި ނަމަވެސް ބޮޑެތި ގައުމުތަކުގައި އަންހެނުންގެ މެދުމަށް ޕިލާޓީސް ކަސްރަތު ވަނީ ވަރަށް ބޮޑަށް މަޝްހޫރުވެފަ އެވެ.

ޕިސާޓީސް ކަސްރަތަކީ ކޮން އެއްޗެއް؟

ޕިލާޓީސް ކަސްރަތަކީ ޖޮސެޕް ޕިލާޓީސް ނަމަކަށް ކިޔާ ޖަރުމަނު މީހަކު އިޖާދުކުރި ކަސްރަތެކެވެ. ޕިލާޓީސް އަށް ފުރަތަމަ ދެވުނު ނަމަކީ "ކޮންޓްރޮލޮޖީ" އެވެ. ޕިލާޓީސް ފުރަތަމަ އުފައްދާފައިވަނީ ބުރަކަށީގައި ރިއްސާ މީހުންނަށް ހުރި ކަސްރަތެއްގެ ގޮތަގަ އެެވެ.

ޕީލާޓީސްގައި ހުންނަނީ ކޮން ކަހަަލަ ކަސްރަތުތަކެއް؟

ޒަމާނަށް އައި ބަދަލުތަކާއެކު ޕިލާޓީސް ހަދާގޮތްތަކަށް ވެސް މިހާރުވަނީ ބަދަލުތަކެއް އައިސްފަ އެވެ. މިހާރު އާންމުކޮށް ހަދަނީ މެޓް މަތީގައި ނުވަތަ ރިޕޯމާ މެޝިނެއްގެ އެހީގަ އެވެ. މި ކަސްރަތު ހަދާނީ އިންސްޓްރަކްޓަރެއްގެ އެހީގަ އެވެ. ދެ ވައްތަރުގައި ވެސް މައިގަނޑުގޮތެއްގައި ހަދާނީ ސްރެންތް އަދި ބެލެންސް ޓްރެއިނިން އެވެ. ޕިލާޓީސް ހެދުމުން ހަށިގަނޑު ވަރުގަދަވެ، މަސްތައް ޓޯންވެ، މީހާގެ ބެލެންސް ރަނގަޅުވެ އެވެ.

ހަމައެކަނި މެޓް މަތީގައިވެސް ޕިލާޓީސް ހެދިދާނެ!

ކުއްލިއަކަށް މަޝްހޫރުވީ ކީއްވެ؟

ކުއްލިއަކަށް ޕިލާޓީސް މަޝްހޫރުވެފައިވަނީ މި ކަސްރަތަކީ ލޯ އިންޕެކްޓް ކަސްރަތަކަށް ވުން ކަން އެކަށީގެންވެ އެވެ. ސޯޝަލް މީޑިއާގައި ޕިލާޓީސް "ޓްރެންޑް" ވާން ދިމާވި މައިގަނޑު ސަބަބަކީ ނުފޫޒްގަދަ މީހުން މި ކަސްރަތު ޕްރޮމޯޓް ކުރަން ފެށުމުންނެވެ. ޓްރެންޑްތައް ވަރަށް އަވަހަށް ބަދަލުވާ ޒަމާނެއްގައި ޕިލާޓީސް އަށް ފަހު އެހެން ވައްތަރެއްގެ ކަސްރަތެއް 2025 ގައި ޓްރެންޑް ވުމަކީ އެކަށީގެންވާ ކަމެކެވެ.