ރަސްމާލެ ހިއްކަން ހަވާލުކުރި ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އަށް 21 މިލިއަން ޑޮލަރު (323 މިލިއަން ރުފިޔާ) ގެ ބަދަލެއް ދޭން ޖެހުނީ ރައީސް ޑރ. މުހައްމަދު މުއިއްޒުގެ ސަބަބުން ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ޕީއެންއެފް އިން މިރޭ ބޭއްވި ޖަލްސާގައި ޔާމީން ވިދާޅުވީ ރަސްމާލެ ހިއްކުމުގެ މަޝްރޫއު ކުރިއަށްގެންދިޔަގޮތުން ދައުލަތަށް ގެއްލުންވެ، ބިންހިއްކަން ކުރިން ހަވާލުކުރި ސީއެމްސީސީއަށް ބަދަލުދޭންޖެހުނީ ރައީސް މުއިއްޒުގެ ސަބަބުން ކަމަށެވެ.

ޑިސެމްބަރު 2023 ވަނަ ދުވަހު ސީއެމްސީސީން ރަސްމާލެ ހިއްކުމުގެ މަސައްކަތް ފެށި އެވެ. ސީއެމްސީއާ އެ މަސައްކަތް ހަވާލުކުރީ ބިން ހިއްކުމުގެ ބަދަލެއްގެ ގޮތުން ހުޅުމާލޭން 10 ހެކްޓަރުގެ ބިމާއި ފުށިދިއްގަރުފަޅުން ހިއްކާ ބިމުން 60 ހެކްޓަރުގެ ބިމުގެ ޑިވެލޮޕްމަންޓް ރައިޓްސް 99 އަހަރަށް އެ ކުންފުންޏަށް ދޭ ގޮތަށެވެ.

މިފަދަ އެއްބަސްވުމެއް ހެދީ ދައުލަތުން އެއްވެސް ފައިސާއެއް އެ ކުންފުންޏަށް ނުދީ އެކަން ކުރުމަށް ކަމަށް ތަކުރާރުކޮށް ރައީސް މުއިއްޒު މީގެކުރިން ވިދާޅުވެފައިވެ އެވެ. އެކަމު އާހިރުގައި ކަންވެގެންދިޔަގޮތަކީ އެއްބަސްވިގޮތަށް ބިން ހިއްކިފައެއްވެސް ނުވެ އެވެ. 21 މިލިއަން ޑޮލަރުގެ ބޮޑު ބަދަލެއް ރައްޔިތުންގެ ޓެކްސް ފައިސާދިން އެ ކުންފުންޏަށް ދޭންޖެހުނީ އެވެ. އެ ކުންފުންޏަށް އެއްވެސް ފައިސާއެއް ދޭން ނުޖެހޭނެ ކަމަށް ހަރުއަޑުން ރައީސް މުއިއްޒު ދެއްކި ޔަގީންކަމުގައި އެއްވެސް އަގެއް ނެތުނީއެވެ.

އެ ކުންފުންޏަށް ބަދަލުދޭ ވާހަކަ ސަރުކާރުން އުޅެނީ ސިއްރުކޮށްގެންނެވެ. ނޫސްތަކުގައި އެ ވާހަކަ ރިޕޯޓްކުރުމުން އެ ކުންފުނިން އެކަން ދޮގުކުރި އެވެ. ނަމަވެސް "ހުރިހާ"އަށް ކަށަވަރުވެފައިވާގޮތުގައި ސަރުކާރާއި އެ ކުންފުންޏާ ދެމެދު ކުރެވުނު މަޝްވަރާތަކަކަށްފަހު އެ ކުންފުންޏަށް 21 މިލިއަން ޑޮލަރުގެ ބަދަލެއް ދޭން ވަނީ ނިންމާފަ އެވެ.