ތ. ހިރިލަންދޫން މާލެއަށް ދަތުރުކުރި މުދާ އުފުލާ ބޯޓުގައި ހިނގި އަލިފާނުގެ ހާދިސާގައި އެކަކު ގެއްލިގެން ހޯދަމުން އަންނަކަމަށް އެމްއެންޑީއެފުން ވިދާޅުވެއްޖެއެވެ.

"ހޮޅުދޫ" ބޯޓު ނަމަކަށް ކިޔާ މުދާ އުފުލާ ބޯޓުގައި އަލިފާން ރޯވެ އެއްކޮށް ވަނީ އަނދާ ހުލިވެފަ އެވެ.

އެމްއެންޑީއެފުން ބުނީ އެ ބޯޓުން ދަތުރު ކުރަމުން ދިޔައީ ކެޕްޓަނާއެކު 18 މީހުން ކަމަށެވެ. އޭގެ ތެެރެއިން އެކަކު ފިޔަވައި އެންމެން ސަލާމަތްކޮށްފައިވާ ކަމަށް އެމްއެންޑީއެފުން ބުނެ އެވެ.

މިހާތަނަށް ނުފެނި ވަނީ ލ. މާވަށު އަލީ މުޝްފިގް މުހައްމަދު 25، ކަމަށް ވެސް އެމްއެންޑީއެފުން ބުނެ އެވެ.

https://www.instagram.com/p/DH9cMDdzqQn/

އެމްއެންޑީއެފާއި ފުލުހުން އަންނަނީ އަލިފާން ރޯވި ބޯޓު ސަރަހައްދުގައި ހަރަކާތްތެރިވަމުންނެވެ.

ލ. މާވަށު ކައުންސިލްގެ ރައީސް އަހުމަދު މޫސާ ވިދާޅުވެފައި ވަނީ އެބޯޓަކީ ތ. ހިރިލަންދޫން މާލެއަށް ދަތުރުކުރަމުން ދިޔަ ބޯޓެއް ކަމަށެވެ. އަދި އެއީ މާވަށަށް ވެސް ދަތުރުކުރާ ބޯޓެއް ކަމަށާއި، އެ ބޯޓުން މާވަށް އަދި ހިރިލަންދޫ މީހުން ވެސް ދަތުރުކުރާ ކަމަށް ކައުންސިލްގެ ރައީސް ވިދާޅުވި އެވެ.

ހޮޅުދޫ ބޯޓުގައި އަލިފާން ރޯވަން ދިމާވި ސަބަބު އަދި ސާފެއް ނުވެ އެވެ.

އެމްއެންޑީއެފް އިން ބުނީ މުޝްފިގު ހޯދުމުގެ މަސައްކަތް ކޯސްޓްގާޑް ޝިޕް އާޒީ، އެފްއައިސީ މާފަތް، އެޗްޕީ 114، ޑައިވަރުންނާއި އެއާ ކޯގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުން ހޯދުމުގެ މަސައްކަތް ކުރަމުން އަންނަ ކަމަށެވެ.