ރާއްޖޭގައި ދުންފަތުގެ އިސްތިއުމާލު ކުރުން މަނާކުރާނެ އުމުރުފުރާއެއް ކަނޑައެޅުމަށްޓަކައި ރައްޔިތުންގެ ޚިޔާލު ހޯއްދެވުމަށް ރައީސް މުހައްމަދު މުއިއްޒު ހުޅުވާލައްވައިފި އެވެ.

ދުންފަތުގެ ނޭދެވޭ އަސަރުތަކުން ޒުވާނުންނާއި އަންނަން އޮތް ޖީލުތައް ސަލާމަތްކުރުމަކީ ސަރުކާރުގެ އިސް އަމާޒެއް ކަމުގައި ރައީސް މުޢިއްޒު ފާހަގަކުރައްވާފައިވާއިރު، މިކަމާ ގުޅޭގޮތުން ކެބިނެޓް ކަރުދާހެއް ތައްޔާރު ކުރެއްވުމަށް ސިއްހީ ވަޒީރަށް އަންގަވާފައިވާ ކަމަށް ވިދާޅުވެފައިވެ އެވެ.

ދުންފަތުގެ އިސްތިއުމާލު ކުރުން މަނާކުރުމަށް ތިން އުމުރުފުރާއެއް ހުށަހަޅުއްވާފައިވެ އެވެ. އެގޮތުން، 2000 ވަނަ އަހަރުން ފެށިގެން އުފަންވާ ކުދިންނަށް (25 އަހަރުން ދަށް)، 2004 ވަނަ އަހަރުން ފެށިގެން އުފަންވާ ކުދިންނަށް (21 އަހަރުން ދަށް)، ނުވަތަ 2007 ވަނަ އަހަރުން ފެށިގެން އުފަންވާ ކުދިންނަށް (18 އަހަރުން ދަށް) ދުންފަތުގެ އިސްތިއުމާލު ކުރުން މަނާކުރުމަށް ވިސްނާވަޑައިގަންނަވާ ކަމަށް ރައީސް މުއިއްޒު ހާމަކުރައްވާފައިވެ އެވެ.

މި ނިންމުމުގައި ރައްޔިތުންގެ ބައިވެރިވުން ހޯދުމަށް، އެކަށީގެންވާ އުމުރުފުރާއަކާ މެދު ރައްޔިތުންގެ ޚިޔާލު ހޯދުމަށް ރައީސުލްޖުމްހޫރިއްޔާގެ އޮފީހުން ވަނީ ދައުވަތު ދީފަ އެވެ. މިއީ ދިވެހި މުޖުތަމައުގެ ސިއްހަތާއި ދުޅަހެޔޮކަން ކުރިއެރުވުމަށް އެޅޭ މުހިންމު ފިޔަވަޅެއް ކަމަށް ރައީސް އޮފީހުން ބުނެ އެވެ.