އެމެރިކާގެ ރައީސް ޑޮނަލްޑް ޓްރަމްޕްގެ އަތުން ފެނުނު ބޮޑު ނިޝާނަކާ ގުޅިގެން އާންމުން ކަންބޮޑުވުން ފާޅުކޮށްފި އެވެ.

ފްރާންސްގެ ރައީސް މެކްރޯނާއެކު ބޭއްވުނު ބައްދަލުވުމެއްގައި ޓްރަމްޕްގެ ކަނާތުގައި ފެނުނު މި ސިއްރު ނިޝާނާ ގުޅޭގޮތުން އާންމުންގެ މެދުގައި އެތައް ސުވާލުތަކެއް އުފެދި، އިންޓަނެޓުގައި ގަދަ ބަހުސްތަކެއް ވަނީ ހިނގާފަ އެވެ.

އެގޮތުން އާންމުން ވަނީ ޓްރަމްޕްގެ ސިއްހީ ހާލަތާމެދު ސުވާލު އުފައްދާފަ އެވެ، އަދި އޭނާގެ ފުރިހަމަ މެޑިކަލް ރިޕޯޓު ހާމަނުކުރާތީ ވެސް ކަންބޮޑުވުން ފާޅުކޮށްފަ އެވެ. މިކަމާ ގުޅިގެން ވައިޓް ހައުސްގެ ނޫސްވެރިންގެ ސެކްރެޓަރީ ކެރޮލައިން ލެވިޓް ވަނީ ނޫސްތަކަށް ޖަވާބުދެއްވާފަ އެވެ.

"ރައީސް ޓްރަމްޕަކީ ރައްޔިތުންގެ މީހެއް. އޭނާ ކޮންމެ ދުވަހަކު އެތައް ހާސް އެމެރިކާ ރައްޔިތުންނާ އަތުގުޅުވާތީ މިކަހަލަ ނިޝާންތައް ފެންނަނީ،" ކެރޮލައިން ވިދާޅުވި އެވެ.

މިފަދައިން ލެވިޓް ބުނިނަމަވެސް، މިއީ ހަގީގަތުގައި ކިހާ އިތުބާރުހުރި ބަޔާނެއްތޯ ގިނަ ބަޔަކު ސުވާލު އުފައްދައިފައިވެ އެވެ.

މި މައްސަލައާ ގުޅިގެން ސިއްހީ މާހިރުން ވިދާޅުވަނީ ސަލާމްކުރުމުގެ ސަބަބުން މިފަދަ ނިޝާންތައް އާންމުކޮށް ނުފެންނަ ކަމަށެވެ. އެހެންކަމުން، ޓްރަމްޕްގެ ސިއްހަތާމެދު އުފެދިފައިވާ ސުވާލުތަކަށް ސާފު ޖަވާބެއް ލިބެންދެން މި މައްސަލަ އިތުރަށް ބޮޑުވެދާނެ ކަމަށް ލަފާކުރެވެ އެވެ.