އިންޑިއާގައި ކޮވިޑް 19ގެ ބިރު ބޮޑުވެ މިބައްޔަށް ފައްސިވާ މަޝްހޫރު ޝަޙްސިއްޔަތުންގެ އަދަދު ދަނީ އިތުރުވަމުންނެވެ. އެގޮތުން ކޮވިޑް 19 އަށް ޕޮޒިޓިވްވި ބޮލީވުޑް ތަރިންގެ ލިސްޓަށް އިތުރު ނަންތަކެއް މިވަނީ އިތުރުވެފަ އެވެ.

އަކްޝޭ ކުމާރު ފަދަ ބޮލިވުޑްގެ ގިނަ ފަންނުވެރިންތަކެއް މިދިޔަ ހަފްތާގައި ވެސް ކޮވިޑަށް ޕޮޒިޓިވްވިކަމުގެ ރިޕޯޓުތައް އައިސްފައިވާއިރު އެ ލިސްޓަށް އެންމެ ފަހުން އިތުރުވެފައިވަނީ 90 ގެ އަހަރުތަކުގައި ބެލުންތެރިންގެ މެދުގައި މަގުބޫލުކަން ހޯދި ގޯވިންދާ އެވެ. ބައްޔަށް ޕޮޒިޓިވްވެފައިވާކަަމާއި ބަލީގެ އަލާމާތތްތައް ފެންނަމުންދާ ކަމަށް ގޯވިންދާ ވަނީ މީޑިއާއަށް ޔަގީން ކޮށްދީފަ އެވެ.

މީގެ އިތުރުން ފަހުގެ ފިލްމުތަކުން ވިދާލި ވިކީ ކައުޝަލް އާއި ބޫމީ ޕަޑްނޭކަރު ވެސް ވަނީ ކޮވިޑް 19 އަށް ޕޮޒިޓިވްވިކަން އިއުލާން ކޮށްފައެވެ.

މިއާއެކު ކޮވިޑް 19ގެ އަސަރު ބޮލީވުޑް ގައި ބޮޑުވެ ގިނަ ޝޫޓިންގް ތަކަށް ވަނީ ބުރޫ އަރާފަ އެވެ. މިދިޔަ އަހަރުން ފެށިގެން އިންޑިއާގެ ސިނަމާތައް ބަންދުކޮށްފައިވާއިރު ފިލްމުތައި ރިލީޒް ނުކުރެވި ގިނަ ގެއްލުންތަކެއް ޕްރޮޑިއުސަރުންނަށް ދަނީ ލިބެމުންނެވެ